Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 73 Hüküm no: 35 Orijinal metin no: [7b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Musa Ağa’nın Belkıs Hatun Vakfı’na olan borcunun terekeden ödenmesi Kezâlik akd-i meclis-i şer‘-i şerîf ettikde sâhibü’l-hayrât ve’l-hasenât Belkıs Hatun Vakfı’na bi’l-fi‘il mütevellî olan işbu bâ‘isü’l-kitâb mezbûr Hasan Ağa meclis-i ma‘kūd-ı mezkûrda mahâlle-i mezbûre ahâlîsinden olup vilâyet-i Rumeli’nde Kalos kasabasında misâfiren sâkin iken bundan akdem vefât eden Musa Ağa b. Ahmed’in sulbî sagīr oğlu Mehmed’in tesviye-i umûruna bâ-hüccet-i şer‘iyye vasiyy-i muhtârı olmağla terekesine bi’l-vesâye vaz‘-ı yed eden Osman Beşe b. Ahmed mahzarında bi’t-tevliye üzerine da‘vâ ve takrîr-i kelâm edip müteveffâ-yı mezbûr Musa Ağa b. Ahmed b. Abdurrahman hayâtında bundan mukaddem vakt-i mezbûra bi’l-fi‘il mütevellî olmağla fevtinden bir sene mukaddem vakf-ı mezbûrun mahlûlâtı esmânından müctemi‘a beş yüz guruşu mâl-ı vakf-ı mezbûrdan olmak üzere huzûrumuzda ahz u kabz ve masârıfına istihlâk edip hattâ müteveffâ-yı mezbûr târîh-i mezkûrda meblağ-ı merkūm ber-vech-i muharrer zimmetinde cânib-i vakf-ı mezbûra deyni olduğunu ikrâr ve işhâd edip kable’l-edâ fevt olmağla terekesinden taleb ederim, suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-i ahrâr-ı ricâl-i Müslimînden olup Ekşi Karadut mahâllesinde sâkin Abdülkerim Ağa b. Abdülfettah ve Karabaş mahâllesinde sâkin Süleyman Çelebi b. Ali li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka müteveffâ-yı mezbûr Musa Ağa b. Ahmed b. Abdullah hayâtında vakf-ı mezbûra bi’l-fi‘il mütevellî olmağla fevtinden bir sene mukaddem vakf-ı mezbûrun mahlûlâtı esmânından müctemi‘a beş yüz guruşu mâl-ı vakf-ı mezbûrdan olmak üzere ahz u kabz ve masârıfına sarfla istihlâk edip zimmetinde cânib-i vakf-ı mezbûra ol kadar guruş deyni olduğunu huzûrumuzda ikrâr ve bizi işhâd eyledi, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın müdde‘î-i mezbûr Hasan Ağa müteveffâ-yı mezbûrun fevtinden sonra vakf-ı mezbûra mütevellî olmağla yemîn teveccüh etmemeğin mûcebiyle müteveffâ-yı mezbûrun hâl-i tevliyetinde ber-mûceb-i şart-ı vâkıf tabh-ı ta‘âm ve it‘âm-ı fukarâ eylediği yirmi yedi guruşu masrûfundan bâkī dört yüz yetmiş üç guruşu müdde‘î-i mezbûr Hasan Ağa’ya terekeden edâya ba‘de’l-hükm vâki‘ hâli ilâ âhırihî. Fi’t-târîhi’l-mezbûr li-seneti’l-merkūme. Şuhûdü’s-sâbıkūn