Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 74 Hüküm no: 36 Orijinal metin no: [7b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacer Hatun’un vefatıyla terekesinin Mehmed Ağa ile Osman Çelebi’ye kaldığı Mahmiye-i İstanbul’da Sülüklü Çeşme kurbünde Suhte Sinan mahâllesinde sâkine iken bundan akdem vefât eden Hacer Hatun bt. Abdullah’ın usûbet-i nesebiye cihetinden ber-vech-i âtî vârisleri oldukları iddi‘â olunup vilâyet-i Anadolu’da medîne-i Harbende sâkinlerinden Mehmed Ağa b. el-Hâc Hasan b. Habil ve Osman Çelebi b. el-Hâc Mustafa b. el-mezbûr el-Hâc Habil tarafından husûs-ı âti’l-beyanda vekîlleri olduğu Mehmed Çelebi b. Mehmed ve es-Seyyid Mustafa Çelebi b. Mahmud şehâdetleriyle mahzar-ı hasm-ı câhidde sâbit ve sübût-ı vekâletine hükm-i şer‘î lâhık olan fahrü’l-müderrisîni’l-kirâm işbu bâ‘isü’l-kitâb Süleyman Efendi b. Şa‘bân meclis-i şer‘-i hatîr-i lâzımü’t-tevkīrde müteveffât-ı mezbûrenin bâ-hüccet-i şer‘iyye vasiyy-i muhtârı olmağla terekesine bi’l-vesâye vâzı‘ü’l-yed olan Ömer Çelebi b. Ahmed mahzarında bi’l-vekâle üzerine da‘vâ ve takrîr-i kelâm edip müteveffât-ı mezbûre Hacer Hatun bt. Abdullah b. Abdullah müvekkilân-ı mezbûrân Mehmed Ağa’nın babası el-Hâc Hasan ve Osman Çelebi’nin babası el-Hâc Mustafa’nın ale’l-iştirâki’s-seviy i‘tâk eyledikleri el-Hâc İsmail’in mu‘takası olup fevt oldukda verâseti sadriye sagīre kızı Hanife ile usûbet-i nesebiye cihetinden müvekkilân-ı mezbûrâna isâbet ettikden sonra sagīre-i mezbûre Hanife dahi vefât edip hissesi cihet-i mezbûreden yine müvekkilân-ı mezbûrâna isâbet edip müteveffâ-yı mezbûre Hacer ve kızı sagīre-i mezbûrenin terekelerine cihet-i mezbûreden müvekkilân-ı mezbûrân Mehmed Ağa ve Osman Çelebi’den gayrı vâris ve müstahakk-ı âhar olmamağla müteveffât-ı mezbûre Hacer ve kızı sagīre-i mezbûre Hanife’nin terekeleri vasiyy-i mezbûr Ömer Çelebi’den bi’l-vekâle taleb eylediğimde bana teslîmde imtinâ‘ eder, suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-i ahrâr-ı ricâl-i Müslimînden şâhidân mezbûrân Mehmed Çelebi ve es-Seyyid Mustafa Çelebi ve el-Hâc Mahmud b. Abdullah li-ecli’ş-şehâde meclis-i şer‘-i şerîfe hâzirûn olup isre’l-istişhâd fi’l-hakīka müteveffât-ı mezbûre Hacer Hatun bt. Abdullah b. Abdullah işbu müdde‘î-i mezbûr Süleyman Efendi’nin müvekkilleri mezbûr Mehmed Ağa’nın babası el-Hâc Hasan ve merkūm Osman Çelebi’nin babası el-Hâc Mustafa’nın ale’l-iştirâki’s-seviy i‘tâk eyledikleri el-Hâc İsmail’in mu‘takası olup fevt oldukda verâseti sadriye sagīre kızı Hanife ile usûbet-i nesebiye cihetinden müvekkilân-ı mezbûrâna isâbet ettikden sonra sagīre-i mezbûre Hanife dahi vefât edip hissesi cihet-i mezbûreden yine mezbûrâna isâbet edip müteveffât-ı mezbûre Hacer ve kızı sagīre-i mezbûre Hanife’nin terekelerine cihet-i mezbûreden müvekkilân-ı mezbûrân Mehmed Ağa ve Osman Çelebi’den gayrı vâris ve müstahakk-ı âhar olduğu ma‘lûmumuz değildir, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettiklerinde mûcebiyle müteveffât-ı mezbûre Hacer ve kızı sagīre-i mezbûre Hanife’nin terekelerini müdde‘î-i vekîl-i mezbûr Süleyman Efendi’ye teslîme vasiyy-i mezbûr Ömer Çelebi’ye tenbîh birle mâ-vaka‘a bi’t-taleb ketb olundu. Fi’l-yevmi’s-sâmin ve’l-ışrîn min-Cumâdelûlâ sene 1143. Şuhûdü’l-hâl: Hasan Çelebi b. Ali, Ahmed Çelebi b. Abdullah, Salih Çelebi b. Halil, el-Hâc İbrahim b. el-Hâc Hasan, Ali Çelebi b. Abdullah, Ahmed Çelebi b. Hasan ve gayruhum