Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 76 Hüküm no: 38 Orijinal metin no: [7b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Ayşe Hatun’un varislerinden İbrahim Ağa’nın terekeden hakkını aldığı Husûs-ı âti’l-beyanın mahâllinde ketb ü tahrîri iltimâs olunmağın savb-ı şer‘-i enverden irsâl olunan Mevlânâ Hasan Efendizâde el-Hâc Abdullah Efendi mahmiye-i İstanbul’da Ayasofya-i kebîr kurbünde Üskübî mahâllesinde el-Hâc Hayrullah Çelebi b. Muslı’nın sâkin olduğu menzile varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde menzil-i mezbûrda sâkine iken bundan akdem vefât eden Âişe bt. İsmail Ağa nâm sagīrenin verâseti vâlidesi Afife Hatun bt. el-mezbûr el-Hâc Hayrullah Çelebi ile li-üm sagīr karındaşı Ahmed b. Mehmed Ağa’ya ve li-eb kebîr ammi İbrahim Ağa ve sagīr ammileri Mustafa ve diğer Ahmed ebnâ-i Mehmed Ağa’ya münhasıra ve tashîh-i meselesi altı sehmden olup sihâm-ı mezbûrenin iki sehmi vâlidesi mezbûre Afife Hatun’a ve [bir] sehmi li-üm karındaşı sagīr-i mezbûr Ahmed’e ve bâkī üç sehmin birer sehmi ammileri mezbûrûn İbrahim Ağa ve Mustafa ve diğer Ahmed’den her birine [8a] isâbeti tahakkukundan sonra mezbûr İbrahim Ağa meclis-i ma‘kūd-ı mezkûrda sagīre-i müteveffât-ı mezbûrenin hayâtında tesviye-i umûruna bâ-hüccet-i şer‘iyye vasiyy-i muhtârı olmağla terekesine bi’l-vesâye vaz‘-ı yed eden işbu bâ‘isü’l-kitâb mezbûr el-Hâc Hayrullah Çelebi b. (°) mahzarında bi’t-tav‘i’s-sâf ikrâr ve takrîr-i kelâm edip mûrisem sagīre-i müteveffât-ı mezbûre Âişe’nin terekesi tahrîr ve ba‘de-ihrâci’l-masârıf tashîh-i merkūm üzere bana isâbet eden ber-mûceb-i defter-i kassâm-ı askerî elli bir bin dört yüz altmış üç akçe ki bi-hesâb-ı guruş dört yüz yirmi sekiz buçuk guruş kırk üç akçeyi terekeden olmak üzere vasiyy-i mezbûr el-Hâc Hayrullah Çelebi yedinden bi’t-tamâm ahz u kabz eyledim, min-ba‘d meblağ-ı mezkûr dört yüz yirmi sekiz buçuk guruş kırk üç akçeden vasiyy-i mezbûr yedinde bir akçe ve bir habbe bâkī kalmayıp mûrisem sagīre-i müteveffât-ı mezbûrenin terekesinden vasiyy-i mezbûrun bi’l-vesâye makbûz ve masrûfuna ve vakıf menzil bedeline müte‘allıka âmme-i da‘vâdan vasiyy-i mezbûr el-Hâc Hayrullah Çelebi’nin zimmetini ibrâ-i âm ile ibrâ ve ıskāt eyledim dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ve ba‘dehû ma‘an mürsel Ahmed Çelebi b. İsmail ve İbrahim b. Halil ile meclis-i şer‘a gelip alâ-vuku‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâmin ve’l-ışrîn min-Cumâdelûlâ sene 1143. Şuhûdü’l-hâl: el-Hâc Süleyman Efendi b. Mustafa, el-Hâc Hasan b. Receb, Mehmed Ağa b. Abdullah, el-Hâc Mehmed Çavuş b. el-Hâc Mehmed, Sofu Mehmed Efendi b. İbrahim, İsmail Ağa b. Hüseyin, Mehmed Efendi b. Şa‘bân