Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 77 Hüküm no: 39 Orijinal metin no: [8a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Raziye Hatun’un vefat eden Rukıye Hatun’un terekesinden talebine dair açtığı davada sulh olduğu Husûs-ı âti’l-beyanın mahâllinde ketb ü tahrîri iltimâs olunmağın savb-ı şer‘-i enverden Mevlânâ Hasan Efendizâde el-Hâc Abdullah Efendi irsâl olunup ol dahi mahmiye-i İstanbul’da Mîrahor mahâllesinde sâkine iken bundan akdem vefât eden Rukıye Hatun bt. Abdullah’ın menziline varıp zeyl-i kitâbda muharrerü’l-esâmi Müslimîn huzûrlarından akd-i meclis-i şer‘-i şerîf ettikde mahâlle-i mezbûre sâkinelerinden olup zâtı mahâlle-i mezbûre sâkinlerinden Müezzin es-Seyyid Mehmed Efendi b. Abdülkerim ve Mehmed Çelebi b. Ahmed ta‘rîfleriyle mu‘arrefe olan Raziye Hatun bt. Abdullah meclis-i ma‘kūd-ı mezkûrda müteveffât-ı mezbûrenin zevc-i metrûkü ve sülüs-i vesâyâsını tenfîze bâ-hüccet-i şer‘iyye vasiyy-i muhtârı olan işbu bâ‘isü’l-kitâb Ahmed Beşe b. İbrahim mahzarında ikrâr-ı tâm ve takrîr-i kelâm edip müteveffât-ı mezbûre Rukıye Hatun bt. Abdullah hâl-i marazında târîh-i fevtinden bir gün mukaddem bi-emrillâhi te‘âlâ fevtinden sonra işbu akd-i meclis olunan mülk menzilin dâhilinde vâki‘ fevkānî bir bâb sedli oda ve mukābilinde tahmînen üç yüz zirâ‘ eşcâr-ı müsmire ve gayr-ı müsmireli bağçeyi terekesinin sülüsünden olmak üzere bana versin deyü huzûr-ı Müslimînde vasiyet ve musırraten aleyhâ fevt olmağla zikri mürûr eden oda ve bağçeyi sülüs-i tereke-i müteveffât-ı mezbûreden olmak üzere taleb ederim deyü zevcim işbu hâzır bi’l-meclis Ali Çelebi tarafımdan bi’l-vekâle da‘vâ eyledikde ol dahi bi’l-külliye inkâr etmekle beynimizde münâza‘ât-ı kesîre ve muhâsamât-ı şedîde vukū‘undan sonra beynimizde muslihûn tavassut edip da‘vâ-i mezkûremden beni müteveffât-ı mezbûrenin terekesi sülüsünden nakid altmış guruş üzerine mezbûr Ahmed Beşe ile sulh eylediklerinde ben dahi sulh-ı mezbûru kabûl ve bedel-i sulh-ı mezkûr altmış guruşu sülüs-i tereke-i müteveffât-ı mezbûreden olmak üzere yedinden tamâmen ahz u kabz eyledim, min-ba‘d bedel-i sulh-ı mezkûr altmış guruşdan mezkûrun yedinde bir akçe ve bir habbe bâkī kalmayıp zikr olunan sedli oda ve bağçeye müte‘allıka âmme-i da‘vâdan mezbûr Ahmed Beşe’nin zimmetini ibrâ-i âm ile ibrâ ve ıskāt eyledim ve husûs-ı merkūma müte‘allıka mezbûr Ahmed Beşe ile vechen mine’l-vücûh ve sebeben mine’l-esbâb da‘vâ ve nizâ‘ım yokdur dedikde gıbbe’t-tasdîk mezbûr Ahmed Beşe meclis-i ma‘kūd-ı mezkûrda mezbûre Raziye Hatun mahzarında ikrâr ve takrîr-i kelâm edip vech-i meşrûh üzere mezbûre Razıye Hatun’a medfû‘um olan bedel-i sulh-ı mezkûr altmış guruş mutâlebesinden mezbûre Razıye Hatun’un zimmetini ben dahi bi’l-asâle ibrâ-i âm ile ibrâ ve ıskāt eyledim dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ve ba‘dehû ma‘an mürsel el-Hâc Ahmed b. Hüseyin ve İbrahim b. Halil ile meclis-i şer‘a gelip alâ-vuku‘ihî inhâ ve takrîr etmeğin mâ-vaka‘a bi’t-taleb ketb olundu. Fî 27 min-Cumâdelûlâ sene 1143. Şuhûdü’l-hâl: Ahmed Çelebi b. Ömer, Mustafa Çelebi b. Mehmed, Süleyman Çelebi b. Bali, Mustafa Beşe b. Ahmed, Hüseyin Çelebi b. Mehmed, el-Hâc Musa b. (°), Mehmed Çelebi b. İbrahim