Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 78 Hüküm no: 40 Orijinal metin no: [8a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Osman’ın vefatıyla hanımı Emine Hatun’a kalan malların takibi için Mehmed Ağa’nın vekil tayin edildiği Mahmiye-i İstanbul’da Tevkī‘î Cafer Çelebi mahâllesi ahâlîsinden olup vilâyet-i Rumeli’nde Praveşte kazâsında sâkin iken bundan akdem vefât eden es-Seyyid el-Hâc Mehmed b. Osman’ın verâseti zevce-i menkûha-i metrûke[si] Emine Hatun bt. Abdullah ile vâlidesi Âişe Hatun bt. el-Hâc Mehmed’e ve sulbiye kebîre kızları Şerîfe Fâtıma ve Şerîfe Saliha’ya ve sulbiye sagīre kızları Şerîfe Rukıye ve Şerîfe Havva’ya ve li-ebeveyn er karındaşı es-Seyyid el-Hâc Mustafa’ya münhasıra ve tashîh-i meselesi yirmi dört sehmden olmağla sihâm-ı mezbûrenin üç sehmi zevcesi mezbûre Emine Hatun’a dört sehmi vâlidesi mezbûre Âişe Hatun’a ve dörder sehmi kızları mezbûrât Şerîfe Fâtıma ve Şerîfe Saliha ve Şerîfe Havva’dan her birine ve bâkī bir sehmi mezbûr es-Seyyid el-Hâc Mustafa’ya isâbeti tahakkukundan sonra sagīretân-ı mezbûretân Şerîfe Rukıye ve Şerîfe Havva’nın vâlideleri ve tesviye-i emrlerine cânib-i şer‘den mansûbe vasiyyeleri olup zâtı ta‘rîf-i şer‘î ile mu‘arrefe olan mezbûre Emine Hatun meclis-i şer‘-i şerîf-i enverde mahmiye-i mezbûrede Kalenderhâne mahâllesinde sâkin bâ‘isü’l-kitâb Mehmed Ağa b. Ahmed mahzarında bi’l-asâle ve bi’l-vesâye ikrâr ve takrîr-i kelâm edip zevcim müteveffâ-yı mezbûrun terekesinden olup zikr olunan Praveşte kazâsında ve sâir ma‘lûmü’l-esâmi kimesneler zimmetlerinde olan hukūku ashâbından ahz u kabz ve bana îsâle ve lede’l-hâce sulh ve ibrâya ve bunlar mütevakkıf olduğu umûrun küllîsine tarafımdan mezbûr Mehmed Ağa’yı vekîl ve nâib-i menâb nasb u ta‘yîn eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 28 min-Cumâdelûlâ sene 1143. Şuhûdü’l-hâl: el-Hâc Mustafa Ağa b. es-Seyyid el-Hâc Osman, es-Seyyid Hasan Çelebi b. Osman, Mehmed Efendi b. İbrahim, Salih Çelebi b. Halil, Ahmed Çelebi b. İbrahim, el-Hâc İbrahim b. Hüseyin