Bab Mahkemesi 54 Numaralı Sicil (H. 1102 / M. 1691) cilt: 20, sayfa: 81 Hüküm no: 44 Orijinal metin no: [7a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Mehmed Çelebi’nin mallarının yeni vasîye teslimi Vilâyet-i Bosna’da Raca kasabası ahâlîsinden olup, bundan akdem tarîk-i hacc-ı şerîfde Aynülkasab [nâm] merhalede vefât eden Mehmed Çelebi b. el-Hâc Halil b. Hasan’ın verâseti li ebeveyn er kardeşi Yakub Çelebi’ye münhasıra olup, ba‘dehû mezbûr Yakub Çelebi dahi medîne-i Saray’da Ferhadbey mahallesinde sâkin iken vefât edip, verâseti sulbiye-i sagīre kızı Fâtıma’ya münhasıra olduğu şer‘an mütehakkik oldukdan sonra sagīre-i mezbûre Fâtıma’nın mâl-ı mevrûsunu hıfza ve tesviye-i umûruna kıbel-i şer‘i’ş-şerîf mansûb vasîsi olan el-Hâc Mehmed b. Abaza Ahmed nâm kimesne meclis-i şer‘-i şerîf-i enverde, müteveffâ-yı evvel mezbûr Mehmed Çelebi’nin terekesini vârisine îsâl için vasiyy-i muhtârı olan işbu bâ‘isü’l-kitâb Racalı el-Hâc Hasan b. Ayas mahzarında bi’l-vesâye ikrâr ve takrîr-i kelâm edip, mezbûr Mehmed Çelebi mahalle-i mezbûrede fevt oldukda merkūm el-Hâc Hasan ber vech-i meşrûh vasiyy-i muhtârı olmağla, ma‘rifet-i şer‘le terekesini kabz ve bey‘-i lâzım gelen muhallefâtını bey‘ ve kabz-ı semen etmekle, yedinde olan işbu hüccet-i şer‘iyye nâtıka olduğu üzre mecmû‘u makbûzu için on beş şerîfi altına bâliğ olmağın, hâlâ merkūm el-Hâc Hasan meblağ-ı mezbûr on beş şerîfi altın ve yine muhallefâtından olup sonradan bey‘ olunan sa‘at ve tabanca bahâsından hâsıla olan beş yüz on dört buçuk altın ki, cem‘an beş yüz on dokuz buçuk şerîfi altın sagīre-i mezbûre Fâtıma için bana def‘ ve teslîm ile ben dahi vesâyetim hasebiyle [7b] yedinden tamâmen ahz u kabz eyledim. Min ba‘d meblağ-ı mezbûr beş yüz on dokuz buçuk şerîfi altından merkūm el-Hâc Hasan’ın yedinde ve kıbelinde bir akçe ve bir habbe bâkī kalmayıp cümlesi makbûzum olmuşdur dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâdis ve’l-ışrîn min Cemâziyelevvel li sene isneteyn ve mi’e ve elf. Şuhûdü’l-hâl: İbrahim Efendi b. Abdülbâki, el-Hâc Mustafa b. Âdil, İsmail b. İbrahim, el-Hâc Ali b. Ahmed, İbrahim Çelebi b. Ahmed.