Bab Mahkemesi 54 Numaralı Sicil (H. 1102 / M. 1691) cilt: 20, sayfa: 82 Hüküm no: 45 Orijinal metin no: [7b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Hüseyin üzerine eşi ve oğlu Sâlih için nafaka takdir edilmesi Mahmiye-i İstanbul’da Beyceğiz mahallesinde vâki‘ Ahmed Ağa odaları sâkinelerinden olup, zâtını ma‘rifet-i şer‘iyye ile ârifân İsmail Çelebi b. Osman ve Mehmed Çelebi b. Abdullah nâm kimesneler ta‘rîfleriyle mu‘arrefe olan Hamide bt. Hüseyin nâm hâtun meclis-i şer‘-i şerîf-i enverde takrîr-i kelâm edip, hâlâ zevcim gāib ani’l-meclis Mehmed Efendi b. Hüseyin nâm kimesne târih-i kitâbdan üç sene mukaddem beni ve firâşından hâsıl ve benden mütevellid sagīr oğlu Sâlih’i bilâ-nafaka bırakıp âhar diyâra gitmekle, hâlâ kıbel-i şer‘den benim ve oğlu sagīr-i mezbûr Sâlih için mezbûrun üzerine kadr-i ma‘rûf nafaka farz ve takdîr olunmak matlûbumdur dedikde, hâkim-i muvakki‘-i sadr-ı kitâb-tûbâ-leh ve hüsnü-me’âb hazretleri dahi mezbûreyi ba‘de’t-tahlîfi’ş-şer‘î kendi nafakası için yevmî sekiz akçe ve sagīr-i mezbûrun nafakası için kezâlik beher yevm sekizer akçe, ki cem‘an mezbûrun üzerine yevmî on altışar akçe farz ve takdîr edip, meblağ-ı mefrûz-ı mezbûr cem‘an on altı akçeyi kendinin ve sagīr-i mezbûrun nafaka ve sâir levâzım-ı mühimmelerine harc ve sarfa ve lede’l-iktizâ istidâneye ve inde’z-zafer zevci gāib-i mezbûr üzerine rücû‘a merkūme Hamide’ye izin vermeğin, mâ hüve’l-vâki‘ bi’t-taleb ketb olundu. Fi’l-yevmi’s-sâdis ve’l-ışrîn min Cemâziyelevvel li sene isneteyn ve mi’e ve elf. Şuhûdü’l-hâl: Süleyman Çelebi b. Emrullah, Hasan Çelebi b. Receb, Mustafa Efendi b. Receb imâmü’l-mezkûr, İbrahim Çelebi b. Ahmed, İsmail Çelebi b. Osman, Mehmed Çelebi b. Abdullah.