Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 82 Hüküm no: 45 Orijinal metin no: [8b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yeniçeri yirmi birinci bölük vakfının vefat eden Kahveci Ömer’de olan alacağının terekesinden ödenmesi Mumâ-ileyh imzâsıyla Mahmiye-i mezbûrede Dergâh-ı âlî -dâme mahfûfen bi’l-ma‘âlî- yeniçerilerinin yirmi bir bölüğe mahsûs odanın mühimmâtına mevkūfe nukūdun bi’l-fi‘il mütevellîsi olan bâ‘isü’l-kitâb İbrahim Odabaşı b. Abdullah meclis-i ma‘kūd-ı mezkûrda müteveffâ-yı mezbûrun bâ-hüccet-i şer‘iyye vasiyy-i muhtârı olmağla terekesine bi’l-vesâye vâzı‘ü’l-yed olan Berber Süleyman Çelebi b. Mehmed mahzarında bi’t-tevliye üzerine da‘vâ ve takrîr-i kelâm edip müteveffâ-yı mezbûr Kahveci el-Hâc Ömer b. Mustafa b. Ömer’e işbu yedimde olan târîh-i kitâb senesi Muharremü’l-haramı gurresi târîhiyle müverrah mümzâ ve mahtûm temessük mûcebince dört yüz guruş mâl-ı vakf-ı mezbûrdan idâne ve teslîm ol dahi ber-vech-i muharrer yedinden istidâne ve kabz ve masârıfına sarfla istihlâk edip hattâ müteveffâ-yı mezbûr hâl-i kemâl-i sıhhatinde meblağ-ı mezbûr cânib-i vakf-ı merkūma zimmetinde vâcibü’l-edâ deyni olduğunu târîh-i mezkûrda huzûr-ı Müslimînde ikrâr ve işhâd edip kable’l-edâ fevt olmağla terekesinden bi’t-tevliye taleb ederim suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb [olundukda] udûl-i ahrâr-ı ricâl-i Müslimînden mahmiye-i mezbûrede Molla Hüsrev mahâllesinde sâkin el-Hâc Ahmed b. Mehmed ve Yavaşça Şahin mahâllesinde sâkin Mehmed Odabaşı b. Musa li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka [9a] müteveffâ-yı mezbûr Kahveci el-Hâc Ömer b. Mustafa b. Ömer işbu müdde‘î-i mezkûrun yedinde olan târîh-i kitâb senesi Muharremü’l-haramı gurresi târîhiyle müverrah mümzâ ve mahtûm temessük mûcebince mâl-ı vakf-ı mezbûrdan istidâne ve kabz ve masârıfıma sarfla istihlâk eylediğim dört yüz guruş cânib-i vakf-ı merkūma zimmetimde vâcibü’l-edâ deynimdir deyü hâl-i kemâl-i sıhhatinde târîh-i mezkûrda huzûrumuzda ikrâr ve bizi işhâd etti, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm vâki‘ hâli ilâ âhırihî. Fi’t-târîhi’l-mezbûr li-seneti’l-merkūme. Şuhûdü’s-sâbıkūn