Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 83 Hüküm no: 46 Orijinal metin no: [9a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed’in annesinden kalan miras hakkının vefat eden babası Kahveci Ömer’de kalmış olması sebebiyle terekesinden ödenmesi Mûmâ-ileyh imzâsıyla Kezâlik akd-i meclis-i şer‘-i şerîf ettikde müteveffâ-yı mezbûrun sulbî sagīr oğlu Mehmed’in tesviye-i umûruna bâ-hüccet-i şer‘iyye vasiyy-i muhtârı bâ‘isü’l-kitâb Berber Süleyman Çelebi b. Mehmed meclis-i ma‘kūd-ı mezkûrda müteveffâ-yı mezbûrun zevce-i menkûha-i metrûkesi olmağla terekesine bi’l-verâse vâzı‘atü’l-yed olup zâtı ta‘rîf-i şer‘î ile mu‘arrefe olan Fâtıma Hatun bt. Sunullah mahzarında bi’l-vesâye üzerine da‘vâ ve takrîr-i kelâm edip müteveffâ-yı mezbûr Kahveci el-Hâc Ömer b. Mustafa b. Ömer hâlâ vasiyy-i muhtârı olduğum sagīr-i mezbûr Mehmed’in babası ve velîsi ve vasiyy-i şer‘îsi olmağla sagīr-i mezbûrun vâlidesi olup bundan esbak vefât eden Rabia Hatun bt. Mehmed’in terekesinden ber-mûceb-i defter-i kassâm-ı askerî sagīr-i mezbûra irs-i şer‘ ile isâbet eden on dokuz bin iki yüz kırk altı akçeyi bi’l-velâye ve bi’l-vesâye kabz ve kendi masârıfına sarfla istihlâk edip hattâ müteveffâ-yı mezbûr hâl-i kemâl-i sıhhatinde meblağ-ı mezbûr cihet-i merkūmeden zimmetinde sagīr-i mezbûra vâcibü’l-edâ deyni olduğunu huzûr-ı Müslimînde ikrâr ve işhâd edip vefât etmekle sagīr-i mezbûrun hâlâ ben vasiyy-i muhtârı olmağla meblağ-ı mezbûru terekesinden bi’l-vesâye taleb ederim suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-i ahrâr-ı ricâl-i Müslimînden mahmiye-i mezbûrede Kara Mustafa Paşa mahâllesinde sâkin İbrahim Efendi b. Ahmed ve Ahmed Ağa b. Mehmed li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka müteveffâ-yı mezbûr Kahveci el-Hâc Ömer b. Mustafa b. Ömer hâl-i kemâl-i sıhhatinde işbu müdde‘î-i mezbûr Süleyman Çelebi’nin hâlâ vasiyy-i muhtârı olduğu sagīr-i mezbûr Mehmed’in babası ve velîsi ve vasiyy-i şer‘îsi olmağla sagīr-i mezbûrun vâlidesi olup bundan esbak vefât eden Rabia Hatun bt. Mehmed’in terekesinden ber-mûceb-i defter-i kassâm-ı askerî sagīr-i mezbûra irs-i şer‘le isâbet eden on dokuz bin iki yüz kırk altı akçeyi bi’l-velâye ve bi’l-vesâye kabz ve kendi masârıfına sarfla istihlâk edip ol vechile meblağ-ı mezbûr oğlu sagīr-i mezbûra zimmetimde vâcibü’l-edâ deynimdir deyü huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın vasiyy-i mezbûrun husûs-ı mezkûrda sun‘u olmamağla yemîn dahi teveccüh etmeyip ba‘de’l-hükm vâki‘ hâli ilâ âhırihî. Fi’t-târîhi’l-mezbûr li-seneti’l-merkūme. Şuhûdü’s-sâbıkūn