Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 84 Hüküm no: 47 Orijinal metin no: [9a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasap Mehmed Beşe’nin vefat eden Kahveci Ömer’deki alacaklarının terekeden ödenmesi Kezâlik akd-i meclis-i şer‘-i şerîf ettikde mahâlle-i mezbûre mescid-i şerîfinde sâhibü’l-hayrât merhûm el-Hâc İsmail b. Ömer’in eczâ-i şerîfesine mevkūfe nukūdun mütevellîsi bâ‘isü’l-kitâb Ahmed Efendi b. Ömer meclis-i ma‘kūd-ı mezkûrda müteveffâ-yı mezbûrun bâ-hüccet-i şer‘iyye vasiyy-i muhtârı olmağla terekesine bi’l-vesâye vâzı‘ü’l-yed olan Berber Süleyman Çelebi b. Mehmed mahzarında bi’t-tevliye üzerine da‘vâ ve takrîr-i kelâm edip müteveffâ-yı mezbûr Kahveci el-Hâc Ömer b. Mustafa b. Ömer zimmetinde işbu yedimde olan mu‘anven ve mersûm deyn temessükü mantûkunca üç yüz guruşdan bâkī yüz seksen guruş mâl-ı vakf olup hattâ müteveffâ-yı mezbûr hâl-i kemâl-i sıhhatinde meblağ-ı mezbûr cihet-i mezkûreden cânib-i vakf-ı mezbûra zimmetinde vâcibü’l-edâ deyni olduğunu huzûr-ı Müslimînde ikrâr ve işhâd edip kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-i ahrâr-ı ricâl-i Müslimînden medîne-i hazret-i Ebî Eyyûb el-Ensârî -raziye anhü Rabbihi’l-bârî- de Koca Kasım Paşa mahâllesinde sâkin İbrahim Efendi b. Ali ve mahmiye-i mezbûrede Koca Mustafa Paşa’da sâkin Mehmed Çelebi b. Halil li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka müteveffâ-yı mezbûr Kahveci el-Hâc Ömer b. Mustafa b. Ömer hâl-i kemâl-i sıhhatinde işbu müdde‘î-i mezbûr Ahmed Efendi’nin yedinde olan mu‘anven ve mersûm deyn temessükü mantûkunca üç yüz guruşdan bâkī yüz seksen guruş cânib-i vakf-ı mezkûra zimmetinde vâcibü’l-edâ deyni olduğunu huzûrumuzda ikrâr ve bizi işhâd eyledi, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm kasab tâifesinden Mehmed Beşe b. Salih meclis-i ma‘kūd-ı mezkûrda vasiyy-i mezbûr Süleyman Çelebi mahzarında üzerine da‘vâ ve takrîr-i kelâm edip müteveffâ-yı mezbûr Kahveci el-Hâc Ömer b. Mustafa b. Ömer zimmetinde vezn ve kıymeti beynimizde ma‘lûm yedimden müşterâ ve makbûz lahm-ı ganem bahasından ba‘de-külli’l-hesâb yirmi beş guruş hakkım olup hattâ müteveffâ-yı mezbûr hâl-i kemâl-i sıhhatinde meblağ-ı mezbûr cihet-i mezbûreden zimmetinde bana vâcibü’l-edâ deyni olduğunu huzûr-ı Müslimînde ikrâr ve işhâd edip kable’l-edâ fevt olmağla terekesinden taleb ederim, suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-i ahrâr-ı ricâl-i Müslimînden Ahmed Çelebi b. Abdullah ve Mustafa Çelebi b. Hasan Beşe li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka müteveffâ-yı mezbûr Kahveci el-Hâc Ömer b. Mustafa b. Ömer hâl-i kemâl-i sıhhatinde işbu müdde‘î-i mezbûr kasab Mehmed Beşe’ye vezn ve kıymeti beynlerinde ma‘lûm lahm-ı ganem bahasından ba‘de-külli’l-hesâb yirmi beş guruş zimmetinde vâcibü’l-edâ deyni olduğunu huzûrumuzda ikrâr ve bizi işhâd eyledi, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm vâki‘ hâli ilâ âhırihî. Fi’t-târîhi’l-mezbûr li-seneti’l-merkūme. Şuhûdü’s-sâbıkūn