Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 85 Hüküm no: 48 Orijinal metin no: [9b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mercan Ağa mahallesi avarızı vakfının vefat eden Kahveci Ömer’de olan alacağının terekesinden ödenmesi Mûmâ-ileyh imzâsıyla Kezâlik akd-i meclis-i şer‘-i şerîf ettikde mahmiye-i mezbûrede Mercan Ağa mahâllesinde avârızına mevkūfe nukūdun bi’l-fi‘il mütevellîsi olan bâ‘isü’l-kitâb Mehmed Efendi b. Hüseyin meclis-i ma‘kūd-ı mezkûrda müteveffâ-yı mezbûrun bâ-hüccet-i şer‘iyye vasiyy-i muhtârı olmağla terekesine bi’l-vesâye vâzı‘ü’l-yed olan Berber Süleyman Çelebi b. Mehmed mahzarında bi’t-tevliye üzerine da‘vâ ve takrîr-i kelâm edip müteveffâ-yı mezbûr Kahveci el-Hâc Ömer b. Mustafa b. Ömer zimmetinde işbu yedimde olan bin yüz kırk iki senesi şehr-i Rebî‘ülâhirinin yirmi ikinci günü târîhiyle müverrah mümzâ ve mahtûm temessük mûcebince asl-ı mâl-ı vakf-ı mezbûrdan üç yüz kırk guruş ve bir kıt‘a kelâm-ı kadîm hediyesinden dahi otuz dört guruş ki cem‘an üç yüz yetmiş dört guruş mâl-ı vakf olup hattâ müteveffâ-yı mezbûr hâl-i kemâl-i sıhhatinde târîh-i mezkûrda meblağ-ı mecmû‘-ı mezkûr cânib-i vakf-ı mezbûra zimmetinde vâcibü’l-edâ deyni olduğunu huzûr-ı Müslimînde ikrâr ve işhâd edip kable’l-edâ fevt olmağla terekesinden taleb ederim, suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-i ahrâr-ı ricâl-i Müslimînden Mustafa Efendi b. Osman ve es-Seyyid el-Hâc İbrahim b. es-Seyyid Ali li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka müteveffâ-yı mezbûr Kahveci Ömer b. el-Hâc Mustafa b. Ömer hâl-i kemâl-i sıhhatinde işbu müdde‘î-i mezbûr Mehmed Efendi’nin yedinde olan bin yüz kırk iki senesi şehr-i Rebî‘ülâhirinin yirmi ikinci günü târîhiyle müverrah mümzâ ve mahtûm temessük mûcebince asl-ı mâl-ı vakf-ı mezbûrdan üç yüz kırk guruş ve bir kıt‘a kelâm-ı kadîm hediyesinden dahi otuz dört guruş ki cem‘an üç yüz yetmiş dört guruş cânib-i vakf-ı merkūma zimmetinde vâcibü’l-edâ deyni olduğunu târîh-i mezkûrda huzûrumuzda ikrâr ve bizi işhâd eyledi, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm vâki‘ hâli ilâ âhırihî. Fi’t-târîhi’l-mezbûr li-seneti’l-merkūme. Şuhûdü’s-sâbıkūn