Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 86 Hüküm no: 49 Orijinal metin no: [9b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Ağa’nın vefat eden Kahveci Ömer’deki alacaklarının terekeden ödenmesi Mûmâ-ileyh imzâsıyla Kezâlik akd-i meclis-i şer‘-i şerîf ettikde mahmiye-i mezbûrede Kapudan İbrahim Paşa mahâllesinde sâkin bâ‘isü’l-kitâb İbrahim Ağa b. Yusuf meclis-i ma‘kūd-ı mezkûrda müteveffâ-yı mezbûrun bâ-hüccet-i şer‘iyye vasiyy-i muhtârı olmağla terekesine bi’l-vesâye vâzı‘ü’l-yed olan Berber Süleyman Çelebi b. Mehmed mahzarında üzerine da‘vâ ve takrîr-i kelâm edip müteveffâ-yı mezbûr Kahveci el-Hâc Ömer b. Mustafa b. Ömer zimmetinde işbu yedimde olan bin yüz kırk iki senesi şehr-i Ramazani’l-mübâreki gurresi târîhiyle müverrah mümzâ ve mahtûm temessük mûcebince cihet-i karz-ı şer‘îden iki yüz elli guruş hakkım olup hattâ müteveffâ-yı mezbûr hâl-i kemâl-i sıhhatinde târîh-i mezkûrda meblağ-ı mezbûr cihet-i mezbûreden zimmetinde bana vâcibü’l-edâ deyni olduğunu huzûr-ı Müslimînde ikrâr ve işhâd edip kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-i ahrâr-ı ricâl-i Müslimînden mahmiye-i mezbûrede Kara Mustafa Paşa mahâllesinde sâkin İbrahim Efendi b. Ahmed ve Ahmed Çelebi b. Abdullah li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka müteveffâ-yı mezbûr Kahveci el-Hâc Ömer b. Mustafa b. Ömer hâl-i kemâl-i sıhhatinde işbu müdde‘î-i mezbûr İbrahim Ağa yedinde olan bin yüz kırk iki senesi Ramazani’l-mübâreki gurresi târîhiyle müverrah mümzâ ve mahtûm temessük mûcebince cihet-i karz-ı şer‘îden iki yüz elli guruş zimmetinde vâcibü’l-edâ deyni olduğunu târîh-i mezkûrda huzûrumuzda ikrâr ve bizi işhâd eyledi, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm vâki‘ ilâ âhırihî. Fi’t-târîhi’l-mezbûr li-seneti’l-merkūme. Şuhûdü’s-sâbıkūn