Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 108 Hüküm no: 71 Orijinal metin no: [13b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Süleyman Ağa’nın Kolancılar Vakfı’na verilmesini vasiyet ettiği paradan bir kısmının vakıf mütevellisine teslim edildiği Husûs-ı âti’l-beyanın mahâllinde ketb ü tahrîri iltimâs olunmağın savb-ı şer‘-i enverden Mevlânâ İbrahim Efendi b. el-Hâc Yusuf irsâl olunup ol dahi mahmiye-i İstanbul’da Haraççı Muhyiddin mahâllesinde sâkine müteveffâ-yı âti’z-zikrin zevce-i metrûkesi Hadîce Hatun bt. Abdullah’ın menziline varıp zeyl-i kitâbda muharrerü’l-esâmi Müslimîn huzûrlarından akd-i meclis-i şer‘-i şerîf ettikde mahmiye-i mezbûrede el-Hâc Hasan mahâllesinde sâkin iken bundan akdem vefât eden Kolancı Süleyman Ağa b. el-Hâc Salih’in mûsâ-lehlerinden olup [K]olancılar Esnâfı Vakfı’nın nukūd-ı mevkūfesine bi’l-fi‘il mütevellî olan el-Hâc Osman b. Mehmed meclis-i ma‘kūd-ı mezbûrda müteveffâ-yı mezbûrun sülüs-i mâlından vesâyâsını tenfîze bâ-hüccet-i şer‘iyye vasiyy-i muhtârı olmağla terekesinin sülüsüne bi’l-vesâye vaz‘-ı yed eden bâ‘isü’l-kitâb es-Seyyid Abdullah Çelebi b. Mehmed mahzarında bi’t-tevliye ikrâr ve takrîr-i kelâm edip müteveffâ-yı mezbûr Süleyman Ağa b. el-Hâ[c Sa]lih hâl-i marazında sülüs-i mâlından Kolancılar Vakfı’na yüz guruş vasiyet edip musırran-aleyhâ vefât eyledikde ba‘de’s-sübût terekesinin sülüsü vefâ etmeyip guremâ iktizâ etmekle vasiyy-i mezbûrun ber-mûceb-i defter-i kassâm-ı askerî makbûzu olan sülüsden bi-tarîkı’l-guremâ vakf-ı mezbûra isâbet eden yetmiş dokuz guruş kırk altı akçeyi tevliyetim hasebiyle vakıf için vasiyy-i mezbûr es-Seyyid Abdullah Çelebi yedinden bi’t-tamâm ve’l-kemâl ahz u kabz eyledim min-ba‘d meblağ-ı mezbûr yetmiş dokuz guruş kırk altı akçeden vasiyy-i mezbûr yedinde bir akçe ve bir habbe bâkī kalmadı dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ve ma‘an irsâl olunan Salih Çelebi b. Halil ve Ali Çelebi b. Mehmed ile meclis-i şer‘a gelip alâ-vuku‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn sene 1143. Şuhûdü’l-hâl: Ali Çavuş Ağa b. el-Hâc İbrahim, el-Hâc Mustafa b. Ebubekir, Ahmed Çelebi b. Hasan, Mehmed Çelebi b. Mustafa, Mehmed Beşe b. Hüseyin, el-Hâc İbrahim b. Musa