Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 109 Hüküm no: 72 Orijinal metin no: [13b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Kolancı Süleyman Ağa’nın varislerine verilmesini vasiyet ettiği paraların ilgililere teslim edildiği Kezâlik akd-i meclis-i şer‘-i şerîf ettikde mahmiye-i mezbûrede el-Hâc Hasan mahâllesinde sâkin iken bundan akdem vefât eden Kolancı Süleyman Ağa b. el-Hâc Salih’in mûsâ-lehlerinden olup mahâlle-i mezbûre ahâlîsinden Eyüb Efendi b. Ali ve el-Hâc Mehmed b. Himmet ve el-Hâc İbrahim b. Musa ve es-Seyyid el-Hâc Abdullah b. el-Hâc Ömer ve Solak Ahmed Çelebi b. Hasan meclis-i ma‘kūd-ı mezbûrda müteveffâ-yı mezbûrun sülüs-i mâlından vesâyâsını tenfîze bâ-hüccet-i şer‘iyye vasiyy-i muhtârı olmağla terekesinin sülüsüne bi’l-vesâye vâzı‘ü’l-yed olan bâ‘isü’l-kitâb es-Seyyid Abdullah Çelebi b. Mehmed mahzarında her biri ikrâr-ı tâm ve takrîr-i kelâm edip müteveffâ-yı mezbûr Kolancı Süleyman Ağa hâl-i marazında sülüs-i mâlından her birimize otuzar guruş vasiyet edip musırran-aleyhâ vefât eylediği ba‘de’s-sübût terekesinin sülüsü vefâ etmeyip guremâ iktizâ etmekle vasiyy-i mezbûrun ber-mûceb-i defter-i kassâm-ı askerî makbûzu olan sülüsden bi-tarîkı’l-guremâ her birimize isâbet eden ikişer bin sekizer yüz elli sekizer akçeden cem‘an on dört bin iki yüz doksan akçeyi bi-kadri’l-hısas vasiyy-i mezbûr es-Seyyid Abdullah Çelebi yedinden bi’t-tamâm ve’l-kemâl ahz u kabz eyledik ba‘de’l-yevm meblağ-ı mecmû‘-ı mezkûr on dört bin iki yüz doksan akçeden vasiyy-i mezbûr yedinde bir akçe ve bir habbe bâkī kalmadı dediklerinde gıbbe’t-tasdîkı’ş-şer‘î yine müteveffâ-yı mezbûrun mûsâ-lehlerinden Saliha Hatun bt. Abdullah ve Canfeda Hatun bt. Abdullah ve Küçük Mehmed b. Ali taraflarından husûs-ı âti’l-beyanda vekîl-i müsecceli mezbûr Solak Ahmed Çelebi b. Hasan meclis-i ma‘kūd-ı mezkûrda vasiyy-i mezbûr es-Seyyid Abdullah Çelebi muvâcehesinde bi’l-vekâle ikrâr ve takrîr-i kelâm edip müteveffâ-yı mezbûr Kolancı Süleyman Ağa sülüs-i mâlından müvekkilem mezbûre Saliha Hatun’a otuz guruş ve müvekkilem Canfeda Hatun’a on beş guruş ve müvekkilem Küçük Mehmed’e elli guruş vasiyet edip musırran-aleyhâ vefât etmekle vasiyy-i mezbûrun ber-mûceb-i defter-i kassâm mûmâ-ileyh makbûzu olan sülüsden bi-tarîkı’l-guremâ müvekkilem mezbûre Saliha Hatun’a isâbet eden iki bin sekiz yüz elli sekiz akçe ve müvekkilem mezbûre Canfeda Hatun’a isâbet eden bin dört yüz yirmi dokuz akçe ve müvekkilem mezbûr Küçük Mehmed’e isâbet eden dört bin yedi yüz altmış üç akçe ki cem‘an dokuz bin elli akçeyi vekâletim hasebiyle müvekkilûn-ı mezbûrûna vermek için vasiyy-i mezbûr yedinden bi’t-tamâm ve’l-kemâl ahz u kabz eyledim min-ba‘d meblağ-ı mecmû‘-ı mezkûr dokuz bin elli akçeden vasiyy-i mezbûr es-Seyyid Abdullah Çelebi yedinde bir akçe ve bir habbe bâkī kalmadı dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde ilâ âhırihî. Fi’t-târîhi’l-mezbûr li-seneti’l-merkūme Şuhûdü’s-sâbıkūn