Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 110 Hüküm no: 73 Orijinal metin no: [13b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Aziz’in nukud vakfından aldığı borcun vefatı sebebiyle terekeden ödenmesi Mahmiye-i İstanbul’da Dergâh-ı âlî yeniçerilerinin elli iki cemâ‘atine mahsûs odanın nukūd-ı mevkūfesine bi’l-fi‘il mütevellî olan işbu bâ‘isü’l-kitâb el-Hâc Hasan Odabaşı b. Abdullah meclis-i şer‘-i hatîr-i lâzımü’t-tevkīrde mahmiye-i mezbûrede Üskübî mahâllesi sâkinlerinden iken bundan akdem vefât eden Moralı Tütüncü el-Hâc Mustafa b. Aziz’in sulbî sagīr oğlu Mehmed ve sulbiye sagīre kızı Hadîce’nin tesviye-i emrlerine bâ-hüccet-i şer‘iyye vasiyy-i muhtâreleri olmağla terekesine bi’l-vesâye vâzı‘atü’l-yed olup zâtı ta‘rîf-i şer‘î ile mu‘arrefe olan müteveffâ-yı mezbûrun li-ebeveyn kız karındaşı Âişe Hatun ile müteveffâ-yı mezbûrun zevce-i menkûha-i metrûkesi olup zâtı kezâlik ta‘rîf-i şer‘î ile mu‘arrefe olan Meryem Hatun bt. Hüseyin mahzarlarında bi’t-tevliye üzerlerine da‘vâ ve takrîr-i kelâm edip müteveffâ-yı mezbûr Moralı Tütüncü el-Hâc Mustafa b. Aziz b. Ali hayâtında bundan mukaddem vakf-ı mezbûra mütevellî olmağla yedimde olan işbu iki kıt‘a deyn temessükü mûcebince mâl-ı vakf-ı mezbûrdan sekiz yüz yetmiş guruş kabz ve masârıfına sarf ile istihlâk etmekle vech-i meşrûh üzere meblağ-ı mezkûr sekiz yüz yetmiş guruş zimmetinde cânib-i vakf-ı mezbûra vâcibü’l-edâ deyni olduğunu târîh-i fevtinden iki ay mukaddem huzûr-ı Müslimînde ikrâr ve işhâd edip kable’l-edâ meyyiten fevt olmağla terekesinden taleb ederim suâl olunsun dedikde gıbbe’s-suâl mezbûretân cevâblarında tereke-i müteveffâ-yı mezbûra ber-vech-i muharrer vaz‘-ı yedlerini ikrâr ve müdde‘î-i mezbûrun ber-vech-i mübeyyen müdde‘âsını inkâr edicek müdde‘î-i mezbûrdan müdde‘âsına beyyine taleb olundukda udûl-i ahrâr-ı ricâl-i Müslimînden yirmi beş sekbânlara mahsûs odada sâkin Salih Beşe b. Ahmed ve mahmiye-i mezbûrede Murad Paşa mahâllesinde sâkin İbrahim Beşe b. Mustafa li-ecli’ş-şehâde meclis-i şer‘-i şerîfe hâzırân olup isre’l-istişhâd fi’l-hakīka müteveffâ-yı mezbûr Moralı el-Hâc Mustafa b. Aziz b. Ali hayâtında vakf-ı mezbûra mütevellî olmağla işbu müdde‘î-i mezbûrun yedinde olan iki kıt‘a deyn temessükü mûcebince mâl-ı vakf-ı mezbûrdan sekiz yüz yetmiş guruşu kabz ve kendi masârıfına sarf ile istihlâk etmekle meblağ-ı mezkûr sekiz yüz yetmiş guruş vech-i meşrûh üzere zimmetinde cânib-i vakf-ı mezbûra vâcibü’l-edâ deyni olduğunu târîh-i fevtinden iki ay mukaddem huzûrumuzda ikrâr ve bizi işhâd eyledi, biz bu husûsa bu vech üzere şâhidleriz şehâdet dahi ederiz deyü her biri [14a] edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın müdde‘î-i mezbûr müteveffâ-yı mezbûrun fevtinden sonra vakf-ı mezbûre mütevellîsi olup husûs-ı mezbûrda sun‘u olmamağla yemîn teveccüh etmemeğin mûcebiyle ba‘de’l-hükm mâ-vaka‘a bi’t-taleb ketb olundu. Fi’l-yevmi’r-râbi‘ min-Cumâdelâhir sene 1143. Şuhûdü’l-hâl: el-Hâc Mustafa, Ali Çelebi b. Aziz, Molla Mehmed b. Hasan, Molla Mahmud b. Mehmed, Salih Çelebi b. Halil