Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 111 Hüküm no: 74 Orijinal metin no: [14a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hafız Ahmed Ağa’nın varislerinden Rukıye’nin terekeden payını aldığı Husûs-ı âti’l-beyanın mahâllinde ketb ü tahrîri için savb-ı şer‘-i enverden Mevlânâ el-Hâc İbrahim Efendi irsâl olunup ol dahi mahmiye-i İstanbul’da Gedikpaşa kurbünde Esirci Kemâl mahâllesinde sâkin es-Seyyid Mehmed Ağa b. es-Seyyid Abdüsselam’ın menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde mahmiye-i mezbûrede İshak Paşa mahâllesi ahâlîsinden olup Mısr-ı Kāhire’den gelirken esnâ-i tarîkde bundan akdem vefât eden Hâfız Ahmed Ağa b. Abdullah’ın verâseti zevce-i menkûha-i metrûkesi Âişe Hatun bt. Mehmed Efendi ile li-ebeveyn halası kızı ve mukırru leh bi’n-neseb cihetinden Rukıye Hatun bt. Ahmed Ağa’ya münhasıra ve tashîh-i meselesi dört sehmden olup sihâm-ı mezbûrenin bir sehmi zevcesi mezbûreye ve bâkī üç sehmi mezbûre Rukıye Hatun’a isâbeti tahakkukundan sonra zâtı Ahmed Ağa b. Hasan ve Mustafa Efendi b. Abdüllatif ta‘rîfleriyle mu‘arrefe olan mezbûre Rukıye Hatun meclis-i ma‘kūd-ı mezkûrda müteveffâ-yı mezbûrun vesâyâsını tenfîze bâ-hüccet-i şer‘iyye vasiyy-i muhtârı olmağla terekesine bi’l-vesâye vaz‘-ı yed eden fahrü’l-akrân bâ‘isü’l-kitâb Osman Ağa b. Abdullah mahzarında bi’l-verâse ikrâr ve takrîr-i kelâm edip müteveffâ-yı mezbûrun terekesi tahrîr ve ba‘de-ihrâci’l-masârıf ve’d-düyûn ve’l-vesâyâ ber-mûceb-i defter-i kassâm-ı askerî tashîh-i mezbûr üzere üç sehim hisseye isâbet edip vasiyy-i mûmâ-ileyhin bi’l-vesâye makbûz olan üç yük doksan bir bin altmış akçeyi vasiyy-i mûmâ-ileyh bana def‘ ve teslîm ben dahi tereke-i müteveffâ-yı mezbûrdan olmak üzere yedinden bi’l-verâse alıp kabz eyledim min-ba‘d meblağ-ı mezbûr üç yük doksan bir bin altmış akçeden vasiyy-i mûmâ-ileyh yedinde bir akçe ve bir habbe bâkī kalmayıp tereke-i müteveffâ-yı mezbûrdan vasiyy-i mûmâ-ileyhin makbûz ve masrûfuna müte‘allıka âmme-i de‘âvî ve mutâlebât ve eymân ve muhâsamâtdan vasiyy-i mûmâ-ileyh ile vechen mine’l-vücûh ve sebeben mine’l-esbâb da‘vâ ve nizâ‘ım yokdur dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ba‘dehû ma‘an irsâl olunan Hasan b. Mustafa ve Ahmed b. Mehmed ile meclis-i şer‘a gelip alâ-vuku‘ihî inhâ ve takrîr etmeğin mâ-vaka‘a bi’t-taleb ketb olundu. Fî 3 min-Cumâdelâhire sene 1143. Şuhûdü’l-hâl: Ömer Ağa b. Ahmed, Mahmud Efendi b. Osman, Yasin Efendi b. Ahmed, İsmail Efendi b. Abdullah el-müezzin, Süleyman Efendi b. Abdullah, el-Hâc Mehmed Ağa b. Abdüsselam, İbrahim Ağa b. Osman, el-Hâc Ali b. Osman, el-Hâc Mehmed b. Ali, Mehmed Efendi b. Mehmed, Ahmed Ağa b. Hacı Yusuf