Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 112 Hüküm no: 75 Orijinal metin no: [14a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hafız Ahmed Ağa’nın Rukıye’den başka varisi olmadığı Kezâlik akd-i meclis-i şer‘-i şerîf ettikde mahmiye-i mezbûrede İshak Paşa mahâllesi ahâlîsinden olup Mısr-ı Kāhire’den gelir iken esnâ-i tarîkde bundan akdem vefât eden Hâfız Ahmed Ağa b. Abdullah’ın ber-vech-i âtî mukarrun-leh bi’n-neseb cihetinden vârisi olduğunu iddi‘â edip zâtı Ahmed Ağa b. Hasan ve Mustafa Efendi b. Abdüllatif ta‘rîfleriyle mu‘arrefe olan bâ‘isetü’l-kitâb Rukıye Hatun bt. Ahmed meclis-i ma‘kūd-ı mezkûrda müteveffâ-yı mezbûrun vesâyâsını tenfîze bâ-hüccet-i şer‘iyye vasiyy-i muhtârı olmağla terekesine bi’l-vesâye vaz‘-ı yed eden fahrü’l-emâsil ve’l-akrân Osman Ağa b. Abdullah mahzarında üzerine da‘vâ ve takrîr-i kelâm edip müteveffâ-yı mezbûr Hâfız Ahmed Ağa’nın babası Abdullah ile benim vâlidem Hadîce’nin babası Ebubekir li-ebeveyn karındaşlar olup hattâ müteveffâ-yı mezbûr hayâtında benim için halam kızı ve fevtimden sonra hasran vârisimdir deyü huzûr-ı Müslimînde ikrâr ve işhâd ve ben dahi muvâcehesinde ba‘de’t-tasdîk musırran-aleyhâ fevt olmağla ber-vech-i muharrer müteveffâ-yı mezbûrun verâsetini mukarrun-leh bi’n-neseb cihetinden bana münhasıra ve terekesine cihet-i mezbûreden benden gayrı vâris ve âhar müstahak yoğ iken vasiyy-i mûmâ-ileyh mâni‘ olur suâl olunsun dedikde gıbbe’s-suâl vasiyy-i mûmâ-ileyh cevâbında tereke-i müteveffâ-yı mezbûra bi’l-vesâye vaz‘-ı yedini ikrâr ve müdde‘iye-i mezbûrenin ber-vech-i muharrer müdde‘âsını inkâr edicek müdde‘iye-i mezbûreden müdde‘âsına beyyine taleb olundukda udûl-i ahrâr-ı ricâl-i Müslimînden mahmiye-i mezbûrede Aksaray kurbünde Kâtib Muslihiddin mahâllesinde sâkin Ahmed Ağa b. Ali ve Süleyman Ağa b. Mustafa ve Mehmed Ağa b. Salih li-ecli’ş-şehâde meclis-i ma‘kūd-ı mezkûrda hâzirûn olup isre’l-istişhâd fi’l-hakīka müteveffâ-yı mezbûr Hâfız Ahmed Ağa b. Abdullah b. Abdullah hayâtında işbu müdde‘iye-i mezbûre Rukıye Hatun için li-ebeveyn halam kızı ve fevtimden sonra hasran vârisimdir deyü huzûrumuzda ikrâr ve bizi işhâd ol dahi muvâcehesinde ba‘de’t-tasdîk musırran-aleyhâ fevt olmağla ber-vech-i muharrer müteveffâ-yı mezbûrun verâseti mukarrun-leh bi’n-neseb cihetinden müdde‘iye-i mezbûreye münhasıra ve terekesine cihet-i mezbûreden müdde‘iye-i mezbûreden gayrı vâris ve âhar müstahak olduğu ma‘lûmumuz değildir biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm vâki‘ hâli ilâ âhırihî. Fi’t-târîhi’l-mezbûr li-seneti’l-merkūme. Şuhûdü’s-sâbıkūn