Bab Mahkemesi 54 Numaralı Sicil (H. 1102 / M. 1691) cilt: 20, sayfa: 83 Hüküm no: 47 Orijinal metin no: [7b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Timurhan bt. Abdullah’ın Ayşe bt. Abdullah’tan alacağı kalmadığı Mahmiye-i İstanbul’da Karabaş mahallesinde sâkin Timurhan bt. Abdullah nâm hâtun zâtı ma‘rifet-i şer‘iyye ile ârifân Sâlih Çelebi b. Mustafa ve Ali b. Bâki ta‘rîfleriyle mu‘arrefe oldukdan sonra meclis-i şer‘-i şerîf-i enverde, mahalle-i merkūme sâkinelerinden işbu râfi‘atü’l-kitâb Ayşe bt. Abdullah nâm hâtun ba‘de’t-ta‘rîf mahzarında ikrâr ve takrîr-i kelâm edip, bundan akdem mezbûre Ayşe Hâtun’a bi tarîki’l-vedî‘a otuz aded yaldız altınlarımı def‘ ve teslîm, ol dahi ber vech-i muharrer kabz u tesellüm ve mesârifine sarfla istihlâk etmeğin, meblağ-ı mezbûru mezbûre Ayşe Hâtun’dan taleb ve da‘vâ edip, ol dahi inkâr etmekle, beynimizde nizâ‘-ı küllî vukū‘undan sonra mezbûre Ayşe Hâtun’dan on beş guruş kıymetli bir kızıl çuha kontoşu bi tarîki’s-sulh bana def‘ ve teslîm, ben dahi ber vech-i muharrer yedinden ahz u kabz edip, bâkī kalan altmış guruş da‘vâsından mezbûre Ayşe’nin zimmetini ibrâ-i âm ile ibrâ ve iskāt edip, ba‘de’l-yevm meblağ-ı mezbûr otuz altına müte‘allika mezbûre Ayşe ile kat‘â da‘vâ ve nizâ‘ım kalmamışdır dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn min Cemâziyelevvel li sene isneteyn ve mi’e ve elf. Şuhûdü’l-hâl: Sâlih Çelebi b. Mustafa, Ali Beşe, Ali Çelebi b. Bâli, Osman Çelebi b. Mehmed, Ali Çelebi Duhânî, Yazıcı Musli Çelebi.