Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 113 Hüküm no: 76 Orijinal metin no: [14a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman Ağa’nın vefatıyla oğluna nafaka takdir edildiği Mahmiye-i İstanbul’da Ali Fakih mahâllesinde sâkin iken bundan akdem vefât eden Osman Ağa b. İbrahim’in sulbî sagīr oğlu Ebubekir’in li-ebeveyn ammizâdesi ve tesviye-i umûruna bâ-hüccet-i şer‘iyye vasiyy-i muhtârı işbu bâ‘isü’l-kitâb el-Hâc Sinan b. Murtaza meclis-i şer‘-i şerîf-i enverde takrîr-i kelâm edip vasîsi olduğum sagīr-i mezbûra nafaka ve kisve-bahaya eşedd-i ihtiyâcı olmağla babası müteveffâ-yı mezbûrdan müntakil mâlından kadr-ı ma‘rûf nafaka ve kisve-baha farz ve takdîr olunmak bi’l-vesâye matlûbumdur dedikde vasiyy-i mezbûrun kelimât-ı meşrûhası vâkı‘a mutâbıka idiği zeyl-i kitâbda muharrerü’l-esâmi Müslimîn haberleriyle lede’ş-şer‘i’l-enver zâhir olmağın hâkim-i muvakkı‘-ı sadr-ı kitâb bi-tevkī‘ihi’r-refî‘i’l-müstetâb tûbâ-lehû ve hüsnü-meâb efendi hazretleri sagīr-i mezbûrun babası müteveffâ-yı mezbûrdan müntakil mâlından beher yevm sekiz akçe nafaka ve kisve-baha farz ve takdîr buyurup meblağ-ı mefrûz-ı mezbûr beher yevm sekiz akçeyi sagīr-i mezbûrun nafaka ve kisve ve sâir levâzım-ı zarûriyesine harc u sarfa ve vakt-i hâcetde istidâneye <> ve inde’z-zafer mâlına rücû‘a vasiyy-i mezbûra izin birle mâ-vaka‘a bi’t-taleb ketb olundu. Fî-gurreti Cumâdelâhire sene 1143. Şuhûdü’l-hâl: Mehmed Efendi b. Yusuf, Mehmed Ağa b. Hasan, Mehmed Ağa b. Siyavuş, el-Hâc İbrahim b. Hüseyin, el-Hâc Mehmed