Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 114 Hüküm no: 78 Orijinal metin no: [14b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Musa Ağa’nın vefatıyla oğlu Mehmed’e nafaka takdir edildiği Mahmiye-i İstanbul’da Mahmudpaşa mahâllesi ahâlîsinden olup vilâyet-i Rumeli’nde Kalas kasabasında sâkin iken bundan akdem vefât eden Musa Ağa b. Ahmed’in sulbî sagīr oğlu Mehmed’in tesviye-i umûruna bâ-hüccet-i şer‘iyye vasiyy-i muhtârı işbu hâfızü’l-kitâb Osman Beşe b. Ahmed talebiyle hâkim-i muvakkı‘-ı sadr-ı kitâb bi-tevkī‘ihi’r-refî‘i’l-müstetâb tûbâ-lehû ve hüsnü-meâb efendi hazretleri sagīr-i mezbûr Mehmed’e câriyesiyle babası müteveffâ-yı mezbûrdan müntakil ze‘âmeti mahsûlünden târîh-i kitâbdan yevmî kırk akçe nafaka ve kisve-baha farz ve takdîr buyurup meblağ-ı mefrûz-ı mezbûru sagīr-i mezbûr Mehmed’in câriyesiyle nafaka ve kisve ve sâir levâzım-ı zarûriyelerine harc u sarfa ve vakt-i hâcetde istidâneye ve inde’z-zafer mâlına rücû‘a vasiyy-i mezbûr Osman Beşe’ye izin birle mâ-vaka‘a bi’t-taleb ketb olundu. Fî 15 min-Cumâdelûlâ sene 1143. Şuhûdü’l-hâl: Fahrü’l-eşbâh Hasan Ağa b. Ahmed, Fahrü’l-akrân Osman Ağa b. Abdullah, Abdülkerim Ağa b. Abdülfettah, el-Hâc Mehmed Ağa b. Abdullah, Ahmed Çelebi b. Ali