Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 115 Hüküm no: 79 Orijinal metin no: [14b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman Efendi’nin vefatından önce Mahmud Efendi’yi vasi tayin ettiği Husûs-ı âti’l-beyanın mahâllinde istimâ‘ ve tahrîri için savb-ı şer‘-i enverden mezûnen Mevlânâ Mehmed Efendi b. Osman irsâl olunup ol dahi mahmiye-i İstanbul’da Cafer Ağa mahâllesinde sâkin iken bundan akdem vefât eden Süleyman Efendi b. Mehmed’in menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde müteveffâ-yı mezbûrun verâseti sulbiye kebîre kızları Fâtıma ve Âişe ve sulbiye sagīre kızı Hanife’ye ve vilâyet-i Anadolu’da Eskişehir kasabasında sâkin li-ebeveyn er karındaşı Halil ile kız karındaşları Hadîce ve Rebiülcinân nâm gāiblere münhasıra olduğu şer‘an zâhir ve nümâyân oldukdan sonra müteveffâ-yı mezbûrun ber-vech-i âtî vasiyy-i muhtârı olduğunu iddi‘â eden bâ‘isü’l-kitâb Mahmud Efendi b. el-Hâc İbrahim meclis-i ma‘kūd-ı mezkûrda mezbûre Fâtıma mahzarında üzerine da‘vâ ve takrîr-i kelâm edip müteveffâ-yı mezbûr Süleyman Efendi b. Mehmed b. Süleyman hayâtında fevtinden on gün mukaddem bi-emrillâhi te‘âlâ vefât eylediğimde cemî‘ terekem ve zimem-i nâsda olan hukūkum ahz u kabz ve vech-i mesnûn üzere levâzım-ı techîz ve tekfînim görülüp düyû[n]-ı müsbetem kazâ olundukdan sonra bâkī kalan terekemin sülüsünden dokuz guruş ıskāt-ı salâtım için fukarâya tasadduk oluna ve beş guruş cenâzem götüren kimesnelere verile ve müdebberem Hadîce Hatun’a altmış guruş ile eşyâ-i memlûkemden işbu bir gömlek ve bir don ve bir anteri ve bir hatâî kaftan ve bir yemenî ve bir serpûş ve iki kadife yasdık ve bir yemenî baş yasdık ve bir minder ve bir tencere ve bir sahan bâ-kapak ve bir sagīr tâbe ve bir sagīr sini ve bir hamam tası ve bir sagīr sîm kuşak ve bir yorgan ve kadr-ı ma‘rûf meblağ ile bir çift vasat altın bilezik iştirâ olunup verile ve benim için zamân-ı vesâyetinde yirmi guruş ücret-i vesâyet verile deyü vasiyet edip tenfîzine ve sagīre-i mezbûrenin tesviye-i umûruna ve gāibûn-ı mezbûrûnun hisse-i ırsiye-i şer‘iyyelerini ahz u kabz ve zabt u hıfza huzûr-ı Müslimînde beni vasiyy-i muhtâr nasb u ta‘yîn ettikde ben dahi muvâcehesinde ba‘de’l-kabûl musırran-aleyhâ fevt oldukda terekesinin sülüsü meblağ-ı mûsâ-leh-i mezbûra müsâ‘id olmağla tenfîz-i vesâyâ murâd eylediğimde mezbûre Fâtıma mâni‘a olur, suâl olunsun dedikde gıbbe’s-suâl ve’l-inkâr müdde‘î-i mezbûrdan ber-vech-i meşrûh müdde‘âsına beyyine taleb olundukda udûl-i ahrâr-ı ricâl-i Müslimînden mahâlle-i mezbûrede sâkin fahrü’l-müderrisîni’l-kirâm Mehmed Emin Efendi b. Halil ve fahrü’l-akrân Hüseyin Ağa b. Abdullah ve Abdullah Çelebi b. Osman li-ecli’ş-şehâde meclis-i ma‘kūd-ı mezkûra hâzirûn olup isre’l-istişhâd fi’l-hakīka müteveffâ-yı mezbûr Süleyman Efendi b. Mehmed b. Süleyman hayâtında fevtinden on gün mukaddem bi-emrillâhi te‘âlâ vefât eylediğimde cemî‘ terekem ve zimem-i nâsda olan hukūkum ahz u kabz ve vech-i mesnûn üzere levâzım-ı techîz ve tekfînim görülüp düyûn-ı müsbetem kazâ olundukdan sonra bâkī kalan terekemin sülüsünden dokuz guruş ıskāt-ı salâtım için fukarâya tasadduk oluna ve beş guruş cenâzem götüren kimesnelere verile ve müdebberem Hadîce Hatun’a altmış guruş ile eşyâ-i memlûkemden işbu bir gömlek ve bir don ve bir anteri ve bir hatâî kaftan ve bir yemenî ve bir serpûş ve iki kıt‘a yasdık ve bir yemenî baş yasdığı ve bir minder ve bir tencere ve bir sahan bâ-kapak ve bir sagīr tâbe ve bir sagīr sini [15a] ve bir hamam tası ve bir sagīr sîm kuşak ve bir yorgan ve kadr-ı ma‘rûf meblağ ile bir çift vasat altın bilezik iştirâ olunup verile ve işbu müdde‘î-i mezbûr için zamân-ı vesâyetinde yirmi guruş ücret-i vesâyet verile deyü vasiyet edip tenfîzine ve sagīre-i mezbûre Hanife’nin tesviye-i umûruna ve gāibûn-ı mezbûrûn Halil ve Hadîce ve Rebiülcinân nâm gāiblerin hisse-i ırsiye-i şer‘iyyelerini ahz u kabz ve zabt u hıfza huzûrumuzda işbu müdde‘î-i mezbûr Mahmud Efendi’yi vasiyy-i muhtârı nasb u ta‘yîn ol dahi muvâcehesinde ba‘de’l-kabûl musırran-aleyhâ <> fevt oldukda terekesinin sülüsü meblağ-ı mûsâ-leh-i mezkûra müsâ‘iddir biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm vâki‘ hâli mevlânâ-yı mezbûr mahâllinde tahrîr ba‘dehû ma‘an irsâl olunan el-Hâc Ahmed b. Hasan ve Ahmed Çelebi b. Halil ile meclis-i şer‘a gelip alâ-vuku‘ihî inhâ ve takrîr etmeğin mâ-vaka‘a bi’t-taleb ketb olundu. Fî 21 min-Cumâdelûlâ sene 1143. Şuhûdü’l-hâl: el-Hâc Mustafa b. Mehmed, el-Hâc Ahmed b. Hüseyin, Süleyman Çelebi b. Mehmed teberdâr, Ahmed Çelebi b. Receb, Abbas Bey b. Osman teberdâr, Mehmed Bey b. Ali teberdâr, Molla Halil b. Mustafa teberdâr, Ahmed Bey b. İslâm teberdâr, Mehmed Bey b. Hasan teberdâr