Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 117 Hüküm no: 80 Orijinal metin no: [15a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma Hatun’un vefatından önce ilk olarak Salih Çelebi’yi vasi tayin edip sonra vasiyetini değiştirerek Mehmed Efendi’yi vasi tayin ettiği Husûs-ı âti’l-beyanın mahâllinde istimâ‘ ve tahrîri için savb-ı şer‘-i enverden mezûnen irsâl olunan Mevlânâ Mehmed Efendi b. İbrahim mahmiye-i İstanbul’da Sancakdâr Hayreddin mahâllesinde sâkine iken bundan akdem vefât eden Fâtıma Hatun bt. Hızır’ın menziline varıp zeyl-i kitâbda muharrerü’l-esâmi Müslimîn huzûrlarından akd-i meclis-i şer‘-i şerîf ettikde, müteveffât-ı mezbûrenin ber-vech-i âtî vasiyy-i muhtârı olduğunu iddi‘â eden hâfızü’l-kitâb Mehmed Efendi b. el-Hâc Ahmed meclis-i mak‘kūd-ı mezkûrda müteveffât-ı mezbûrenin zevc-i metrûkü olmağla terekesine bi’l-verâse vâzı‘ü’l-yed olan Mustafa Beşe b. Mehmed mahzarında üzerine da‘vâ ve takrîr-i kelâm edip müteveffât-ı mezbûre Fâtıma Hatun bt. Hızır b. Hasan hâl-i kemâl-i sıhhatinde fevtinden bir sene mukaddem bi-emrillâhi te‘âlâ vefât eylediğimde cemî‘ terekem ve zimem-i nâsda olan hukūkum ahz u kabz olunup vech-i mesnûn üzere levâzım-ı techîz ve tekfînim görüle ve düyûn-ı müsbetem kazâ olundukdan sonra bâkī kalan terekemin sülüsünden yüz guruş ifrâz olunup meblağ-ı mezbûr ile ıskāt-ı salâtım ve eyyâm-ı mübârekede tabh-ı ta‘âm ve it‘âm-ı fukarâ oluna ve iki kıt‘a mushaf-ı şerîf alınıp her biri müstahakkına verile deyü vasiyet edip tenfîzine işbu hâzır bi’l-meclis es-Seyyid Salih Çelebi’yi vasiyy-i muhtâr nasb u ta‘yîn ettikde ol dahi vesâyet-i mezbûreyi kabûl edip lâkin müteveffât-ı mezbûre hâl-i marazında fevtinden iki gün mukaddem vasiyet-i mezkûresinden bi’l-külliye rücû‘ ve mezbûr es-Seyyid Salih Çelebi’yi vesâyetden azledip bi-emrillâhi te‘âlâ vefât eylediğimde cemî‘ terekem ve zimem-i nâsda olan hukūkum ahz u kabz olunup vech-i mesnûn üzere levâzım-ı techîz ve tekfînim görüle ve düyûn-ı müsbetem kazâ olundukdan sonra bâkī kalan terekemin sülüsü ifrâz olunup sülüs-i mezbûrdan dört bin akçe ile ıskāt-ı salâtım oluna ve kadr-ı ma‘rûf meblağ ile üç kıt‘a mushaf-ı şerîf alınıp her biri müstahakkına verile ve on nefer kimesneye ikişer guruş verilip rûhum için hatm-i şerîf tilâvet ettirile ve kadr-ı ma‘rûf meblağ ile on [kıyye] şem‘-i revgan alınıp mahmiye-i mezbûrede Hobyar mahâllesinde vâki‘ Çivizâde Mescid-i şerîfine verile ve kadr-ı ma‘rûf meblağ ile yetmiş bin tevhîd-i şerîf ettirilip sevâbı rûhuma ihdâ oluna ve iki bin dört yüz akçe ile eyyâm-ı mübârekede tabh-ı ta‘âm ve it‘âm-ı fukarâ oluna ve yirmi guruş ile ta‘mîr-i kabrim olunan ve Seydi Ömer mahâllesi müezzini Abdullah Efendi’ye bin akçe verile ve benim için vasiyy-i muhtârım beş bin akçe ahz u kabz ve temellük eyleye ve sülüs-i mezbûrdan her ne fazla kalırsa vücûh-ı birr-i hayra harc u sarf oluna deyü vasiyet edip tenfîzine huzûr-ı Müslimînde beni vasiyy-i muhtâr nasb u ta‘yîn ettikde ben dahi muvâcehesinde ba‘de’l-kabûl musırraten-aleyhâ mezbûre Fâtıma Hatun vefât etmekle tenfîz-i vesâyâ murâd eylediğimde mezbûr Mustafa Beşe mâni‘ olur suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-i ahrâr-ı ricâl-i Müslimînden mahmiye-i mezbûrede Koca Mustafa Paşa mahâllesinde sâkin Himmet Dede b. Mehmed ve Hoca Hayreddin mahâllesinde sâkin Hulusi Efendi b. Mehmed li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka şahsı rü’yetimiz ile ma‘lûmumuz olan müteveffât-ı mezbûre Fâtıma Hatun bt. Hızır b. Hasan hâl-i kemâl-i sıhhatinde fevtinden bir sene mukaddem bi-emrillâhi te‘âlâ vefât eylediğimde cemî‘ terekem ve zimem-i nâsda olan hukūkum ahz u kabz olunup vech-i mesnûn üzere levâzım-ı techîz ve tekfînim görüle ve düyûn-ı müsbetem kazâ olundukdan sonra bâkī kalan terekemin sülüsünden yüz guruş ifrâz olunup meblağ-ı mezbûr ile ıskāt-ı salâtım ve eyyâm-ı mübârekede tabh-ı ta‘âm ve it‘âm-ı fukarâ oluna ve iki kıt‘a mushaf-ı şerîf alınıp her biri müstahakkına verile deyü vasiyet edip tenfîzine işbu hâzır bi’l-meclis es-Seyyid Salih Çelebi’yi vasiyy-i muhtâr nasb u ta‘yîn ettikde ol dahi vesâyet-i mezbûreyi kabûl edip lâkin müteveffât-ı mezbûre hâl-i marazında fevtinden iki gün mukaddem vasiyet-i mezkûresinden bi’l-külliye rücû‘ ve mezbûr es-Seyyid Salih Çelebi’yi vesâyetden azledip bi-emrillâhi te‘âlâ vefât eylediğimde cemî‘ terekem ve zimem-i nâsda olan hukūkum ahz u kabz olunup vech-i mesnûn üzere levâzım-ı techîz ve tekfînim görüle ve düyûn-ı müsbetem kazâ olundukdan sonra bâkī kalan terekemin sülüsü ifrâz olunup sülüs-i mezbûrdan dört bin akçe ile ıskāt-ı salâtım oluna ve kadr-ı ma‘rûf meblağ ile üç kıt‘a mushaf-ı şerîf alınıp her biri müstahakkına verile ve on nefer kimesneye ikişer guruş verilip rûhum için hatm-i şerîf tilâvet ettirile ve kadr-ı ma‘rûf meblağ ile on kıyye şem‘-i revgan alınıp mahmiye-i mezbûrede Hobyar mahâllesinde vâki‘ Çivizâde Mescid-i şerîfine verile ve kadr-ı ma‘rûf meblağ ile yetmiş bin tevhîd-i şerîf ettirilip sevâbını rûhuma ihdâ oluna ve iki bin dört yüz akçe ile eyyâm-ı mübârekede tabh-ı ta‘âm ve it‘âm-ı fukarâ oluna ve yirmi guruş ile ta‘mîr-i kabrim oluna ve Seydi Ömer mahâllesi müezzini Abdullah Efendi’ye bin akçe verile ve vasiyy-i muhtârım mezbûr Mehmed Efendi beş bin akçe ahz u kabz ve temellük eyleye ve sülüs-i mezbûrdan fazla kalırsa vücûh-ı birr-i hayra harc [ü] sarf oluna deyü vasiyet edip tenfîzine işbu müdde‘î-i mezbûr Mehmed Efendi’yi vasiyy-i muhtâr nasb u ta‘yîn ettikde ol dahi muvâcehesinde ba‘de’l-kabûl musırraten-aleyhâ mezbûre Fâtıma Hatun vefât eyledi, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm vâki‘ hâli mevlânâ-yı mezbûr [15b] mahâllinde tahrîr ba‘dehû ma‘an irsâl olunan el-Hâc İbrahim b. Hüseyin ve Mehmed b. Abdullah ile meclis-i şer‘a gelip alâ-vuku‘ihî inhâ ve takrîr etmeğin mâ-vaka‘a bi’t-taleb ketb olundu. Fî 26 min-Cumâdelûlâ sene 1143. Şuhûdü’l-hâl: Halil Ağa b. İbrahim, es-Seyyid Abdurrahman Efendi b. Mehmed Efendi, Mustafa Çelebi b. Hızır, es-Seyyid Ahmed Ağa b. Ahmed, Mustafa Ağa b. Ahmed, Mehmed Çelebi b. Süleyman, İsmail Çavuş b. Halil, Halil Çavuş b. Mustafa, Mustafa Ağa b. Mehmed, Ali Ağa b. Mehmed