Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 119 Hüküm no: 81 Orijinal metin no: [15b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Fatıma Hatun’un varislerinin terekeden haklarını aldıkları Kezâlik akd-i meclis-i şer‘-i şerîf ettikde müteveffât-ı mezbûrenin verâseti zevc-i metrûkü Mustafa Beşe b. Mehmed ile li-ebeveyn er karındaşı Ali Beşe’ye ve li-ebeveyn kız karındaşı Âişe Hatun’a münhasıra olduğu şer‘an zâhir ve mütebeyyen oldukdan sonra müteveffât-ı mezbûrenin sülüs-i vasiyeti olmağla tashîh-i meselesi dokuz sehmden olup sihâm-ı mezbûrenin üç sehmi sülüs-i vasiyetine ve bâkī altı sehmin üç sehmi zevci mezbûr Mustafa Beşe’ye ve iki sehmi mezbûr Ali Beşe’ye ve bir sehmi mezbûre Âişe Hatun’a isâbeti tahakkukundan sonra mezbûr Mustafa Beşe ve zâtı ta‘rîf-i şer‘î ile mu‘arrefe olan mezbûre Âişe Hatun meclis-i ma‘kūd-ı mezkûrda müteveffât-ı mezbûrenin terekesine bi’l-verâse vaz‘-ı yed eden bâ‘isü’l-kitâb mezbûr Ali Beşe mahzarında her biri bi’l-verâse ikrâr ve takrîr-i kelâm edip mûrisemiz müteveffât-ı mezbûrenin terekesi tahrîr ve ba‘de-ihrâci’l-masârıf ve’s-sülüs ber-mûceb-i defter-i kassâm-ı askerî tashîh-i mezkûr üzere hissemize isâbet eden otuz dört bin elli iki akçeyi terekeden olmak üzere mezbûr Ali Beşe yedinden bi-kadri’l-hısas tamâmen alıp kabz eyledik min-ba‘d meblağ-ı mezkûr otuz dört bin elli iki akçeden mezbûr Ali Beşe yedinde ve zimmetinde bir akçe ve bir habbe bâkī kalmayıp mûrisemiz müteveffât-ı mezbûrenin dâhil-i defter-i terekesine müte‘allıka âmme-i de‘âvî ve kâffe-i mutâlebât ve eymân [ve] muhâsamâtdan mezbûr Ali Beşe’nin zimmetini ibrâ-i âmm-ı kātı‘ü’l-hısâm ile ibrâ ve ıskāt eyledik dediklerinde gıbbe’t-tasdîkı’ş-şer‘î mezbûr Ali Beşe dahi meclis-i mezbûrda mezbûrân Mustafa Beşe ve Âişe Hatun mahzarlarında ikrâr ve takrîr-i kelâm edip mûrisem müteveffât-ı mezbûrenin terekesinden tashîh-i mezbûr üzere bana isâbet eden yedi bin beş yüz yirmi altı akçeyi mezbûrân Mustafa Beşe ve Âişe Hatun yedlerinden tamâmen alıp kabz edip min-ba‘d meblağ-ı mezbûrdan mezbûrân yedlerinde ve zimmetlerinde bir akçe ve bir habbe bâkī kalmayıp müteveffât-ı mezbûrenin dâhil-i defter-i terekesine müte‘allıka âmme-i de‘âvî ve kâffe-i eymân ve muhâsamâtdan mezbûr Mustafa Beşe ve Âişe Hatun’un zimmetlerini ibrâ-i âmm-ı kātı‘ü’l-hısâm ile ibrâ ve ıskāt eyledim dedikde gıbbe’t-tasdîkı’ş-şer‘î vâki‘ hâli ilâ-âhırihî. Fi’t-târîhi’l-mezbûr li-seneti’l-merkūme. Şuhûdü’s-sâbıkūn