Bab Mahkemesi 54 Numaralı Sicil (H. 1102 / M. 1691) cilt: 20, sayfa: 84 Hüküm no: 49 Orijinal metin no: [8a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Manolaki v. Petro ve eşi ile ödünç para aldıkları Avram v. Avram’ın birbirlerinin zimmetini ibra etmesi Husûs-ı âti’l-beyânın mahallinde ketb ve tahrîri için matlûben irsâl olunan Mevlânâ Ali Efendi b. Sunullah, mahmiye-i İstanbul’da Balatkapısı hâricinde Karabaş mahallesi sükkânından Demirci Manolaki v. Petro nâm zimmînin menziline varıp, zeyl-i kitâbda muharrerü’l-esâmi müslimîn huzûrlarında akd-i meclis-i şer‘-i nebevî eyledikde, tâife-i Yahudun Katalan cemâ‘atinden olup yine mahalle-i mezbûrede sâkin Hakim Avram v. Avran v. Avram nâm Yahudi tarafından zikri âtî husûsu ikrâra vekîl olduğu cemâ‘at-i mezbûreden Aslan v. David v. Aslan ve Yehi v. Mosi v. Menahem nâm Yahudiler şehâdetleriyle hasm-ı câhid-i şer‘î muvâcehesinde şer‘an sâbit ve ve sübût-ı vekâletine hükm-i şer‘î lâhık olan Sedyat v. Mosi v. Avram nâm Yahudi meclis-i ma‘kūd-ı mezbûrda, işbu bâ‘isü’s-sifr merkūm Manolaki ile zevcesi olup, zâtını ma‘rifet-i şer‘iyye ile ârifân Ayvat v. Hristo ve Duma v. Todori nâm zimmîler ta‘rîfleriyle mu‘arrefe olan Kasandere bt. Duma nâm nasrâniye muvâcehesinde bi’l-vekâle ikrâr ve takrîr-i kelâm edip, müvekkilim mezbûr Avram târih-i kitâbdan altı sene mukaddem mezbûrân Manolaki ve Kasandere’ye bin yedi yüz yirmi beş guruş ikrâz ve teslîm, onlar dahi iktirâz ve kabz edip, mukābelesinde mezbûre Kasandere yedinde mülkü ve hakkı olan yüz yirmi beş elmas taşlı üç bâfte ve bir mücevher kuşak ve elmas ve yakut taşlı bir mücevher sâ‘atini rehin vaz‘ ve teslîm, müvekkilim mezbûr dahi irtihân ve kabz eylediğinden sonra müvekkilim mezbûr Avraham meblağ-ı mezbûr bin yedi yüz yirmi beş guruşunu mezbûrândan taleb edip, zikr [olunan] kuşak ve sâ‘ati rehin [ve] teslîm murâd eyledikde, mezbûrân cevâblarında, mukaddemâ bilâ-devr-i şer‘î dört yüz guruş vermişdik, aslâ zam ederiz demekle, beynimizde münâza‘ât-ı kesîre ve muhâsamât-ı şedîde vâki‘ olmuşdu. El-hâletü hâzihî beynlerine muslihûn tavassut edip, müvekkilim mezbûr Avram’ı mezbûrân ile bin üç yüz yetmiş beş guruş üzerine sulh eylediklerinde, müvekkilim dahi sulh-ı mezbûru kabûl ve bedel-i sulh olan meblağ-ı mezbûr bin üç yüz yetmiş beş [guruşu] mezbûr Manolaki yedinden tamâmen ahz u kabz ve zikri mürûr eden kuşak ve sâ‘ati bi aynihâ mezbûreye teslîm, ol dahi ahz u kabz ve tesellüm edip, husûs-ı mezbûra ve bi’l-cümle târih-i kitâba gelince beynlerinde cereyân eden ahz u i‘tâ ve mu‘âmelât-ı şettâya müte‘allika âmme-i de‘âvî ve mutâlebâtdan müvekkilim mezbûr mezbûrânın zimmetlerini ibrâ-i âmm-ı râfi‘ü’l-hisâmla ibrâ ve iskāt edip, mezbûrân dahi husûs-ı mezbûra ve bilâ-devr-i şer‘î verdik dedikleri dört yüz guruş ve bi’l-cümle târih-i kitâba gelince beynlerinde cereyân eden ahz u i‘tâ eylediler dedikde, gıbbe’t-tasdîki’l-mu‘teber vâki‘ hâli mevlânâ-yı mezbûr mahallinde ketb ve tahrîr edip, ba‘dehû ma‘an ba‘s olunan Mehmed Çelebi b. İbrahim ve Çukadâr Mustafa Beşe b. Mehmed ile meclis-i şer‘-i şerîfe gelip alâ-vukū‘ihî inhâ ve takrîr etmeğin, mâ hüve’l-vâki‘ bi’t-taleb ketb olundu. Fi’l-yevmi’r-râbi‘ ve’l-ışrîn min Cemâziyelevvel li sene isneteyn ve mi’e ve elf. Şuhûdü’l-hâl: Mehmed Çelebi b. Bayram, Ahmed Çelebi b. Ali, Hasan Çelebi b. Süleyman, Mehmed Çelebi b. Abdullah, Yusuf Çavuş Hüseyin, Duma v. Todori, Vasil v. Yani, Asvador v. Hristo, Yanaki v. Bogos, Yako v. Avram, Aslan v. David, Avram v. Mosi, Salamon v. Mosi, Mihalaki v. Andriyes.