Bab Mahkemesi 54 Numaralı Sicil (H. 1102 / M. 1691) cilt: 20, sayfa: 85 Hüküm no: 50 Orijinal metin no: [8a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Yusuf’un boşandığı kocasından alacak iddiasını ispat edemediği Mahmiye-i İstanbul’da Şehzâde Sultan Mehmed Hân Câmi‘-i şerîfi kurbunda sâkine Ayşe bt. Yusuf nâm hâtun ba‘de’t-ta‘rîfi’ş-şer‘î meclis-i şer‘-i şerîf-i enverde, zevc-i mutallıkı işbu râfi‘ü’l-kitâb Süleyman Çelebi b. Arslan nâm kimesne mahzarında üzerine da‘vâ ve takrîr-i kelâm edip, merkūm Süleyman Çelebi zevcim olup, târih-i kitâbdan üç ay mukaddem beni bâyinen tatlîk etmekle zimmetinde mütekarrir ma‘kūdun aleyh olan bin beş yüz mehr-i müeccelimin dört yüz akçesini yedinden ahz u kabz, mâ‘adâsı olan bin yüz akçe mezbûrun zimmetinde bâkī kalmağın, hâlâ suâl olunup meblağ-ı mezbûr yüz akçenin dahi alıverilmesi matlûbumdur dedikde, gıbbe’s-suâl mezbûr Süleyman Çelebi cevâbında, müdde‘iye-i mezbûrenin zimmetinde ma‘kūdun aleyh ancak kabzına mu‘terif olduğu dört yüz akçe mehr-i müecceli olup kendiye edâ etmişdim deyu mâ‘adâ bin yüz akçeyi bi’l-külliye inkâr edicek, müdde‘iye-i mezbûreden müdde‘âsına beyyine taleb olundukda, ityân-ı beyyineden izhâr-ı acz edip tahlîfe dahi tâlib olmamağın, mûcebiyle müdde‘iye-i mezbûre bilâ-beyyine bî-vech mu‘ârazadan men‘ birle, mâ vaka‘a bi’t-taleb ketb olundu. Fi’l-yevmi’l-ışrîn min Cemâziyelevvel li sene isneteyn ve mi’e ve elf. Şuhûdü’l-hâl: Ahmed b. Ahmed, İbrahim Çelebi b. Ahmed, Receb b. Osman, İbrahim b. Mehmed.