Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 146 Hüküm no: 100 Orijinal metin no: [20b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Ahmed Ağa’nın hanımı Ümmü Gülsüm’e mehrinin terekeden ödenmesi Kezâlik akd-i meclis-i şer‘-i şerîf ettikde müteveffâ-yı mezbûrun zevce-i menkûha-i metrûkesi olup zâtı ta‘rîf-i şer‘î ile mu‘arrefe olan işbu bâ‘isü’l-kitâb Ümmü Gülsüm Hatun bt. Süleyman meclis-i ma‘kūd-ı mezbûrda müteveffâ-yı mezbûrun sulbî sagīr oğlu Ali’ye tashîhan li’d-da‘vâ vasî nasb olunan es-Seyyid el-Hâc Abdullah Çelebi b. Mahmud mahzarında üzerine da‘vâ ve takrîr-i kelâm edip zevcim müteveffâ-yı mezbûr Hânende Ahmed Ağa b. Abdurrahman b. Abdullah hâl-i kemâl-i sıhhatinde fevtinden on dört sene mukaddem beni on bin akçe mehr-i müeccel tesmiyesiyle huzûr-ı Müslümînde tezevvüc ve kabûl edip akd-i nikâh beynimizde kāim iken mehr-i mezbûru kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘iye-i mezbûreden müdde‘âsına beyyine taleb olundukda udûl-i ahrâr-ı ricâl-i Müslimînden mârrü’z-zikr Süleymaniye kurbünde Mollagürânî mahâllesinde sâkin Abdullah Çelebi b. Abdullah ve es-Seyyid Mahmud Çelebi b. Ali li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-hakīka müteveffâ-yı mezbûr Hânende Ahmed Ağa b. Abdurrahman b. Abdullah hâl-i kemâl-i sıhhatinde fevtinden on dört sene mukaddem zevcesi işbu müdde‘iye-i mezbûre Ümmü Gülsüm Hatun on bin akçe mehr-i müeccel tesmiyesiyle huzûrumuzda tezevvüc ve kabûl edip akd-i nikâh beynlerinde kāim iken vefât eyledi, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm vâki‘ hâli mevlânâ-yı mezbûr ilâ-âhırihî. Fi’t-târîhi’l-mezbûr seneti’l-merkūme. Şuhûdü’s-sâbıkūn