Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 168 Hüküm no: 114 Orijinal metin no: [24b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Keresteciler Kethüdası Ahmed Ağa’nın hanımı Meryem’in mehrini terekeden talep ettiği Kezâlik akd-i meclis-i şer‘-i şerîf ettikde mahmiye-i mezbûrede Vâlidehanı kurbünde Dâye Hatun mahâllesinde sâkin iken bundan akdem vefât eden sâbıkā Keresteciler Kethüdâsı el-Hâc Ahmed Ağa b. el-Hâc Hüseyin’in verâseti zevce-i menkûha-i metrûkesi olup zâtı ta‘rîf-i şer‘î ile mu‘arrefe olan işbu bâ‘isetü’l-kitâb Meryem Hatun bt. el-Hâc İbrahim meclis-i ma‘kūd-ı mezkûrda müteveffâ-yı mezbûrun li-ebeveyn kız karındaşı olmağla terekesine bi’l-verâse vâzı‘atü’l-yed olan Hâce Rukıye Hatun tarafından müseccel vekîli olan Ali Efendi b. Ali ile müteveffâ-yı mezbûrun vâlidesi Emetullah Hatun bt. el-Hâc Mustafa tarafından kezâlik müseccel vekîli olup zâtı ta‘rîf-i şer‘î ile mu‘arrefe olan Fâtıma Hatun bt. Mustafa mahzarlarında üzerlerinde da‘vâ ve takrîr-i kelâm edip zevcim müteveffâ-yı mezbûr Keresteciler Kethüdâsı el-Hâc Ahmed Ağa b. el-Hâc Hüseyin b. Hasan hayâtında fevtinden on sene mukaddem tezevvüc murâd ettikde altmış bin akçe mehr-i müeccel tesmiyesiyle huzûr-ı Müslimînde beni tezevvüc ve kabûl edip akd-i nikâh beynimizde kāim iken mehr-i mezbûru kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘iye-i mezbûrdan müdde‘âsına beyyine taleb olundukda udûl-i ahrâr-ı ricâl-i Müslimînden mahmiye-i mezbûrede Akik? mahâllesinde sâkin İmam Ahmed Efendi b. Mehmed ve Müezzin el-Hâc Mahmud b. Habib li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka müteveffâ-yı mezbûr sâbıkā Keresteciler kethüdâsı el-Hâc Ahmed Ağa b. Hüseyin b. Hasan hayâtında fevtinden on sene mukaddem tezevvüc murâd ettikde işbu müdde‘iye-i mezbûre Meryem Hatun bt. el-Hâc İbrahim’i huzûrumuzda altmış bin akçe mehr-i müeccel tesmiyesiyle tezevvüc ve kabûl edip akd-i nikâh beynlerinde kāim iken vefât eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm vâki‘ hâli mevlânâ-yı mezbûr ilâ-âhırihî. Fi’t-târîhi’l-mezbûr li-seneti’l-merkūme. Şuhûdü’s-sâbıkūn