Bab Mahkemesi 54 Numaralı Sicil (H. 1102 / M. 1691) cilt: 20, sayfa: 86 Hüküm no: 52 Orijinal metin no: [8b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ümmühâni bt. Hacı İbrahim’in boşandığı eşi Süleyman b. Ramazan’da alacağı kalmadığı Mahmiye-i İstanbul’da el-Hâc Muhyiddin mahallesi sâkinelerinden olup, zâtını ma‘rifet-i şer‘iyye ile [ârifân] el-Hâc Ali b. Abdullah ve Osman b. Şaban ta‘rîfleriyle mu‘arrefe olan Ümmühâni bt. el-Hâc İbrahim nâm hâtun meclis-i şer‘-i şerîf-i enver ve mahfil-i dîn-i münîf-i ezherde, zevc-i mutallıkı bâ‘isü hâze’l-kitâb Süleyman b. Ramazan mahzarında ikrâr ve takrîr-i kelâm edip, mezbûr Süleyman târih-i kitâbdan on yedi ay mukaddem beni bâyinen tatlîk etmekle, zimmetinde mehr-i müeccelim altı bin akçe ve yedinde eşyâ-i memlûkemden iki yan keçesi ve iki yasdık gılâfı ve bir vasat tepsi ve bir gömlek ve üç aded uçkuru mezbûr Süleyman’dan taleb ve da‘vâ ve mecmû‘undan mezbûr Süleyman ile iki bin akçe üzerine sulh olup, bedel-i sulh olan meblağ-ı mezbûr iki bin akçeyi beher ayda beşer yüz akçeden bi tarîki’t-taksît dört ayda mezbûr Süleyman bana edâ ve teslîm, ben dahi yedinden bedel-i mezbûr iki bin akçeyi tamâmen ahz u kabz eyledim. Ba‘de’l-yevm zevc-i mutallıkım mezbûr Süleyman ile hukūk-ı zevciyyete ve mehr-i müeccelim ile eşyâ-i mezkûreye müte‘allika da‘vâdan zevc-i mutallıkım mezbûr Süleyman’ın zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim dedikde, gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâdis aşer min Cemâziyelevvel li sene isneteyn ve mi’e ve elf. Şuhûdü’l-hâl: Süleyman b. Muharrem, Mehmed b. Bekir, Mehmed b. Mustafa, Hasan b. Hasan, Mehmed b. Mehmed, Receb b. Müslim.