Bab Mahkemesi 54 Numaralı Sicil (H. 1102 / M. 1691) cilt: 20, sayfa: 87 Hüküm no: 53 Orijinal metin no: [8b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hatice bt. Abdülmennân’ın kocası Osman’dan muhâlaa yoluyla boşanması Mahmiye-i İstanbul’da Mimar Ayas mahallesinde sâkin Hatice bt. Abdülmennân nâm hâtun ba‘de’t-ta‘rîfi’ş-şer‘î meclis-i şer‘-i şerîf-i Ahmedî’de, zevc-i dâhili işbu hâfizu’l-kitâb Osman b. ( ) nâm kimesne mahzarında ikrâr ve takrîr-i kelâm edip, zevcim mezbûr Osman zimmetinde mütekarrir ve ma‘kūdun aleyh olan iki bin akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve me’ûnet-i süknâm kendi üzerine olmak üzre zevcim mezbûr Osman ile muhâla‘a-i sahîha-i şer‘iyye ile muhâla‘a edip, ol dahi hul‘-ı mezbûru ba‘de’l-kabûl hukūk-ı zevciyyete müte‘allika âmme-i da‘vâdan her birimiz âharın zimmetini ibrâ-i âmla ibrâ ve iskāt eyledik dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî min Cemâziyelevvel li sene isneteyn ve mi’e ve elf. Şuhûdü’l-hâl: İbrahim Çelebi b. Ahmed, Ebûbekir b. Hüseyin, Abdülkādir Efendi b. Ahmed, Mustafa b. Şaban, el-Hâc Ali b. Abdülkādir.