Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 183 Hüküm no: 125 Orijinal metin no: [27b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Bosnavi Mehmed Efendi’nin Şerbetçi Abdullah’a borcu olduğu Şerbetçi tâifesinden işbu bâ‘isü’l-kitâb el-Hâc Abdullah b. İbrahim meclis-i şer‘-i şerîf-i lâzımü’t-teşrîfde mahmiye-i İstanbul’da Kabasakal mahâllesinde sâkin iken bundan akdem vefât eden Başmuhâsebeci Bosnavî el-Hâc Mehmed Efendi b. Zülfikar’ın zevce-i menkûha[sı] ve sulbî sagīr oğlu Salih Ağa’nın tesviye-i umûruna bâ-hüccet-i şer‘iyye vasiyy-i muhtâresi olmağla terekesine bi’l-verâse ve bi’l-vesâye vâzı‘atü’l-yed olan Saraylı Bahtiyar Hatun bt. Abdullah tarafından müseccel vekîli olan Kâtib Mustafa Efendi b. el-Hâc Mehmed ile müteveffâ-yı mezbûrun sulbiye kebîre kızı Âişe Hatun’un zevci ve tarafından kezâlik müseccel vekîli fahrü’l-a‘yân el-Hâc Mehmed Ağa b. Musa Ağa mahzarlarında üzerlerine da‘vâ ve takrîr-i kelâm edip müteveffâ-yı mezbûr Başmuhâsebeci Bosnavî el-Hâc Mehmed Efendi b. Zülfikar b. Abdullah zimmetinde yedimden müşterâ ve makbûz şerbet ve gülbeşeker bahalarından ba‘de-külli’l-hesâb yirmi yedi bin beş yüz akçe hakkım olup hattâ müteveffâ-yı mezbûr hâl-i sıhhatinde meblağ-ı mezbûr cihet-i merkūmeden zimmetinde bana vâcibü’l-edâ deyni olduğunu huzûr-ı Müslimînde ikrâr ve işhâd edip kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-i ahrâr-ı ricâl-i Müslimînden mahmiye-i mezbûrede Hoca Paşa mahâllesinde sâkin el-Hâc Mehmed b. İbrahim ve el-Hâc Abdullah b. Ali [28a] li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müteveffâ-yı mezbûr Başmuhâsebeci Bosnavî el-Hâc Mehmed Efendi b. Zülfikar b. Abdullah hâl-i kemâl-i sıhhatinde işbu müdde‘î-i mezbûr Şerbetçi el-Hâc Abdullah b. İbrahim yedinden müşterâ ve makbûz şerbet ve gülbeşeker bahalarından ba‘de-külli’l-hesâb yirmi yedi bin beş yüz akçe zimmetinde vâcibü’l-edâ deyni olduğunu huzûrumuzda ikrâr ve bizi işhâd eyledi, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm mâ-vaka‘a bi’t-taleb ketb olundu. Fî 13 min-Cumâdelâhire sene 1143. Şuhûdü’l-hâl: Ahmed Çelebi b. İbrahim, Ali Çelebi b. Osman, el-Hâc Mehmed Ağa b. Ali, İbrahim Çelebi b. Abdüsselam, Ali Çelebi b. Mehmed çukadâr, Ahmed Çelebi b. İsmail muhzır