Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 184 Hüküm no: 126 Orijinal metin no: [28a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Bosnavi Mehmed Efendi’nin Ekmekçi Artin’e borcu olduğu Husûs-ı âti’l-beyanın mahâllinde istimâ‘ ve tahrîri için savb-ı şer‘-i enverden mezûnen Mevlânâ Sadi Ali Efendi irsâl olunup ol dahi mahmiye-i İstanbul’da Mercan Ağa mahâllesinde umdetü’l-a‘yân el-Hâc Mehmed Ağa b. Musa Ağa’nın menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde ekmekçi tâifesinden işbu bâ‘isü’s-sifr Artin v. Mator nâm zimmî meclis-i ma‘kūd-ı mezkûrda mahmiye-i mezbûrede Kabasakal mahâllesinde sâkin iken bundan akdem vefât eden Başmuhâsebeci Bosnavî el-Hâc Mehmed Efendi b. Zülfikar’ın zevce-i menkûha-i metrûkesi ve sulbî sagīr oğlu Salih Ağa’nın tesviye-i umûruna bâ-hüccet-i şer‘iyye vasiyy-i muhtâresi olmağla terekesine bi’l-verâse ve bi’l-vesâye vâzı‘atü’l-yed olup zâtı ta‘rîf-i şer‘î ile mu‘arrefe olan Saraylı Bahtiyar Hatun bt. Abdullah mahzarında üzerine da‘vâ ve takrîr-i kelâm edip merhûm-ı mezbûr Başmuhâsebeci Bosnavî el-Hâc Mehmed Efendi b. Zülfikar b. Abdullah zimmetinde işbu yedimde olan mümzâ ve mahtûm iki kıt‘a müzekkere mûcebince yedinden müşterâ ve makbûz ekmek bahasından ba‘de-külli’l-hesâb on dokuz bin sekiz yüz elli üç akçe ve cihet-i karz-ı şer‘îden sekiz bin yüz dört akçe ki cem‘an ciheteyn-i merkūmeteynden yirmi yedi bin dokuz yüz elli yedi akçe hakkım olup hattâ merhûm-ı mezbûr hâl-i kemâl-i sıhhatinde meblağ-ı mecmû‘-ı mezbûr ciheteyn-i merkūmeteynden zimmetinde bana vâcibü’l-edâ deyni olduğunu huzûr-ı Müslimînde ikrâr ve işhâd edip kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘î-i mesfûrdan müdde‘âsına beyyine taleb olundukda udûl-i ahrâr-ı ricâl-i Müslimînden merhûm-ı mezbûrun etbâ‘ından Kâtib Mustafa Efendi b. el-Hâc Mehmed ve el-Hâc İbrahim b. Süleyman li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka merhûm-ı mezbûr Başmuhâsebeci el-Hâc Mehmed Efendi b. Zülfikar b. Abdullah hâl-i kemâl-i sıhhatinde işbu müdde‘î-i mesfûr Ekmekçi Artin zimmîye yedinde olan iki kıt‘a müzekkere mûcebince yedinden müşterâ ve makbûz ekmek bahasından ba‘de-külli’l-hesâb on dokuz bin sekiz yüz elli üç akçe ve cihet-i karz-ı şer‘îden dahi sekiz bin yüz dört akçe ki cem‘an ciheteyn-i merkūmeteynden yirmi yedi bin dokuz [yüz] elli yedi akçe zimmetinde vâcibü’l-edâ deyni olduğunu huzûrumuzda ikrâr ve bizi işhâd eyledi, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’l-mu‘teber mûcebiyle ba‘de’l-hükm vâki‘ hâli mevlânâ-yı mezbûr mahâllinde tahrîr ba‘dehû ma‘an irsâl olunan Ali Çelebi b. İbrahim ve diğer Ali Çelebi b. Mehmed ile meclis-i şer‘a gelip alâ-vuku‘ihî inhâ ve takrîr etmeğin mâ-vaka‘a bi’t-taleb ketb olundu. Fî 13 min-Cumâdelâhire sene 1143. Şuhûdü’l-hâl: el-Hâc Mehmed Ağa b. Musa Ağa, Ali Ağa b. Mustafa, Musa Ağa b. el-Hâc Mehmed Ağa, el-Hâc Mehmed Ağa b. Ali, Ahmed Çelebi b. İbrahim, Ali Çelebi b. Osman, İbrahim Çelebi b. İslam