Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 185 Hüküm no: 127 Orijinal metin no: [28a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmü Gülsüm Hatun’un varislerinin terekedeki haklarını almak için Ahmed Efendi’yi vekil tayin ettikleri Husûs-ı âti’l-beyanın mahâllinde ketb ü tahrîri için savb-ı şer‘-i enverden Mevlânâ es-Seyyid Ali Efendi irsâl olunup ol dahi mahmiye-i İstanbul’da Cezerî Kasım Paşa mahâllesinde sâkine iken bundan akdem vefât eden Ümmü Gülsüm Hatun bt. Veli’nin ile’l-vefât mütemekkine olduğu menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde müteveffât-ı mezbûrenin verâseti zevc-i metrûkü Abdurrahman Efendi b. Ali ile vilâyet-i Rumeli’nde Hezargrad kazâsına tâbi‘ Cabir nâm karyede sâkin zî-rahm cihetinden li-ebeveyn karındaşı oğlu Halil ve kızları Fâtıma ve Âişe’ye münhasıra ve tashîh-i meselesi sekiz sehmden olup sihâm-ı mezbûrenin dört sehmi mezbûr Abdurrahman Efendi’ye ve iki sehmi mezbûr Halil’e ve bir sehmi mezbûretân Fâtıma ve Âişe’den her birine isâbeti tahakkukundan sonra mezbûrûn Halil ve Fâtıma ve Âişe’nin hisse-i mevkūfelerini ahz u kabz ve îsâle bâ-hüccet-i şer‘iyye vasiyy-i muhtârı olan el-Hâc Ahmed Efendi b. Receb meclis-i ma‘kūd-ı mezkûrda müteveffât-ı mezbûrenin zevc-i metrûkü olmağla terekesine bi’l-verâse vâzı‘ü’l-yed olan bâ‘isü’l-kitâb mezbûr Abdurrahman Efendi mahzarında bi’l-vesâye ikrâr ve takrîr-i kelâm edip müteveffât-ı mezbûrenin terekesi tahrîr ve ba‘de-ihrâci’l-masârıf ber-mûceb-i defter-i kassâm-ı askerî tashîh-i mezbûr üzere merkūmûn Halil ve Fâtıma ve Âişe’nin hisselerine isâbet eden on üç bin dört yüz yirmi iki akçeyi terekeden olmak üzere [28b] vesâyetim hasebiyle mezbûr Abdurrahman Efendi yedinden bi’t-tamâm ve’l-kemâl ahz u kabz eyledim min-ba‘d meblağ-ı mezbûr on üç bin dört yüz yirmi iki akçeden mezbûr Abdurrahman Efendi yedinde ve zimmetinde bir akçe ve bir habbe bâkī kalmadı dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ba‘dehû ma‘an irsâl olunan Salih Çelebi b. Halil ve Hasan Çelebi b. Ramazan ile meclis-i şer‘a gelip alâ-vuku‘ihî inhâ ve takrîr etmeğin mâ-vaka‘a bi’t-taleb ketb olundu. Fî 8 min-Cumâdelâhire sene 1143. Şuhûdü’l-hâl: Es-seyyid Molla İbrahim b. Hüseyin, Molla Osman b. Şa‘bân, İbrahim Çelebi b. Receb, Salih Beşe b. Halil, Hasan Çelebi b. Ramazan