Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 186 Hüküm no: 128 Orijinal metin no: [28b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmü Gülsüm Hanım’ın vasiyetini yerine getirmek üzere Ahmed Efendi’yi tayin ettiği Kezâlik akd-i meclis-i şer‘-i şerîf ettikde müteveffât-ı mezbûrenin ber-vech-i âtî vasiyy-i muhtârı olduğunu iddi‘â eden bâ‘isü’l-kitâb el-Hâc Ahmed Efendi b. Receb meclis-i ma‘kūd-ı mezkûrda müteveffât-ı mezbûrenin zevc-i metrûkü olmağla terekesine bi’l-verâse vâzı‘ü’l-yed olan Abdurrahman Efendi b. Ali mahzarında üzerine da‘vâ ve takrîr-i kelâm edip müteveffât-ı mezbûre Ümmü Gülsüm Hatun bt. Veli b. Abdullah hâl-i kemâl-i sıhhatinde bi-emrillâhi te‘âlâ vefât eyledikde cemî‘ terekem ahz u kabz olunup zevcim mezbûr Abdurrahman Efendi hissesini aldıkdan sonra bâkīsini vilâyet-i Rumeli’nde Hezargrad kazâsına tâbi‘ Cabir nâm karyede sâkin li-ebeveyn kız karındaşım oğlu Halil ve kızları Fâtıma ve Âişe’ye îsâl oluna deyü vasiyet edip tenfîzine huzûr-ı Müslimînde beni vasiyy-i muhtâr nasb u ta‘yîn ettikde ben dahi muvâcehesinde ba‘de’l-kabûl musırraten-aleyhâ vefât etmekle tenfîz-i vesâyâ murâd eylediğimde mezbûr Abdurrahman Efendi mâni‘ olur suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-i ahrâr-ı ricâl-i Müslimînden Ayasofya mahâllesi sükkânından Bostanî Halil Bey b. Receb ve Mustafa Çelebi b. Ahmed li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka şahsı rü’yetimiz ile ma‘lûmumuz olan müteveffât-ı mezbûre Ümmü Gülsüm Hatun bt. Veli b. Abdullah hâl-i kemâl-i sıhhatinde bi-emrillâhi te‘âlâ vefât eylediğimde cemî‘ terekem ahz u kabz olunup zevc-i metrûkü mezbûr Abdurrahman Efendi hissesini aldıkdan sonra bâkīsini vilâyet-i Rumeli’nde Hezargrad kazâsına tâbi‘ Cabir nâm karyede sâkin li-ebeveyn kız karındaşım oğlu Halil ve kızları Fâtıma ve Âişe’ye îsâl oluna deyü vasiyet edip tenfîzine huzûrumuzda işbu müdde‘î-i mezbûr el-Hâc Ahmed Efendi’yi vasiyy-i muhtâr nasb u ta‘yîn ettikde ol dahi muvâcehesinde ba‘de’l-kabûl musırraten-aleyhâ vefât eyledi, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm vâki‘ hâli mevlânâ-yı mezbûr ilâ-âhırihî. Fi’t-târîhi’l-mezbûr li-seneti’l-merkūme. Şuhûdü’s-sâbıkūn