Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 186 Hüküm no: 129 Orijinal metin no: [28b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Afife Hatun’un vefat eden kızı Ayşe Hatun’un terekesinden bir şey saklamadığı Husûs-ı âti’z-zikrin mahâllinde istimâ‘ ve tahrîri için savb-ı şer‘-i enverden mezûnen Mevlânâ Burusî Mehmed Efendi irsâl olunup ol dahi mahmiye-i İstanbul’da Akbıyık mahâllesinde Afife Hatun bt. Ahmed’in menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde menzil-i mezbûrda sâkine iken bundan akdem vefât eden Âişe Hatun bt. Ahmed’in verâseti vâlidesi mezbûre Afife Hatun’a ve sadriye sagīre kızı Hadîce bt. Ahmed Ağa’ya ve li-ebeveyn ammi oğlu olup vilâyet-i Anadolu’da Viranşehir kazâsında sâkin Mustafa b. Receb’e münhasıra ve tashîh-i meselesi altı sehmden olmağla sihâm-ı mezbûrenin bir sehmi vâlidesi mezbûreye ve üç sehmi kızı sagīre-i mezbûra ve bâkī iki sehmi mezbûr Mustafa’ya isâbeti tahakkukundan sonra sagīre-i mezbûrenin babası ve velîsi mezbûr Ahmed Ağa b. Mustafa meclis-i ma‘kūd-ı mezkûrda zâtı ta‘rîf-i şer‘î ile mu‘arrefe olan bâ‘isetü’l-kitâb mezbûre Afife Hatun mahzarında üzerine da‘vâ ve takrîr-i kelâm edip müteveffât-ı mezbûrenin eşyâ-i memlûkesinden mecmû‘u iki yüz guruş kıymetli bir sîm sitil ve bir sîm maşraba ve bir sîm kahve ibriği ve bir sîm şamdân ma‘a makrâs ve bir sîm ayna ve bir sedefli ayna ve bir çift zümrüd küpe ve bir çift harcî zümrüd küpe ve bir sîm kaşık ve bir çift ...? sîm kuşak ve bir altın kuşak ve bir zümrüd yüzük ve bir Mushaf-ı şerîf ve bir Muhammediye ve üç kat came ve on beş boyama dîbâi ve bir hâre kavuşdurma bâ-anteri ve bir nühâs mankal ve üç dikme yorgan ve üç yemenî yorgan ve otuz yağlık ve bir kırmızı şilte ve iki mantarî boğça ve bir kat işleme hamam rahtı ve bir hamam tası bâ-kildân ve bir ocak güğümü ve bir askı ve on yorgan çarşebi ve sekiz döşek çarşebi ve altı yasdık gılâfı ve altmış iki vukıyye yün ve iki minder ve bir demir mankal ve dört kuşhâne sahanı ve bir çuka kapı perdesi ve bir aba ocak perdesi ve üç çift altı fincân zarfı ve bir cedîd destâr ve bir kapıkulu cübbe don ve bir köhne Cezâyirî ihrâmı ile kırk dört zincirli altınını ketm ü ihfâ etmekle kızım sagīre-i mezbûrenin hisse-i ırsiyesini bi’l-velâye taleb eylediğimde vermede ta‘allül eder suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda ityân-ı beyyineden izhâr-ı acz ile istihlâf etmeğin eşyâ-i muharrer-i mezbûre ile zikr olunan altını bi-gayrı hakkın ketm ü ihfâ etmeyip üzerine şer‘an redd ü zamân lâzım gelmediğinde mezbûre Afife Hatun’a yemîn teklîf olundukda ol dahi hasebü’l-mesûl yemîn billâhi’l-aliyyi’l-a‘lâ etmeğin mûcebiyle müdde‘î-i mezbûru bilâ-beyyine mu‘ârazadan men‘ eylediğini mevlânâ-yı mezbûr mahâllinde tahrîr ba‘dehû ma‘an irsâl olunan Ahmed Çelebi b. İsmail ve Mehmed Çelebi b. Ali ile meclis-i şer‘a gelip alâ-vuku‘ihî inhâ ve takrîr etmeğin mâ-vaka‘a bi’t-taleb ketb olundu. Fî-selhi min-şehri Rebî‘ülâhir sene 1143. Şuhûdü’l-hâl: Eş-şeyh Ahmed Efendi b. eş-Şeyh Mehmed, el-Hâc Mehmed b. el-Hâc Kasım, Ahmed Ağa b. Mustafa, İbrahim Ağa b. Halil, Ali Çelebi b. Mehmed