Bab Mahkemesi 54 Numaralı Sicil (H. 1102 / M. 1691) cilt: 20, sayfa: 87 Hüküm no: 54 Orijinal metin no: [8b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Seyyid Ali b. Hasan’ın alacak tahsili için İsmail Beşe b. İbrahim’i vekil tayin etmesi Mahrûse-i Galata’ya tâbi‘ kasaba-i Kasımpaşa’da Yeldeğirmeni mahallesi sükkânından Seyyid Ali b. Hasan b. Abdullah nâm kimesne meclis-i şer‘-i şerîf-i enver ve mahfil-i dîn-i münîf-i ezherde, mahmiye-i İstanbul’da Keçeci Pîrî mahallesinde sâkin işbu râfi‘ü’l-kitâb İsmail Beşe b. İbrahim nâm kimesne mahzarında ikrâr ve takrîr-i kelâm edip, yedimde olan deyn temessükü nâtıka olduğu üzre işbu hâzır bi’l-meclis Musa b. İbrahim zimmetinde târih-i kitâbdan üç yüz altmış gün tamâmına değin zikr-i müeccel olmak üzre beynimizde ilm-i şer‘î ile ma‘lûm emti‘a bahâlarından on sekiz bin akçe hakkım olup, hâlâ ben âhar diyâra gitmekle müddet-i mezbûre hulûlünde meblağ-ı mezbûru merkūm Musa’dan taleb ve da‘vâ ve ahz u kabza ve bana îsâle ve husûs-ı mezbûrun mütevakkıf olduğu umûrun küllîsine merkūm İsmail Beşe’yi tarafımdan vekîl nasb ve ta‘yîn eyledim dedikde, ol dahi vech-i muharrer üzre vekâlet-i mezbûreyi kabûl ve hizmet-i lâzımesin edâya ta‘ahhüd etmeğin, gıbbe’t-tasdîki’l-mu‘teberi’l-vicâhî mâ vaka‘a bi’t-taleb ketb olundu. Fi’l-yevmi’s-sâdis ve’l-ışrîn min şehri Cemâziyelevvel sene 1102. Şuhûdü’l-hâl: Mustafa b. Şaban Galatalı, Ebûbekir b. Halil, Ahmed b. İbrahim, İbrahim Çelebi b. Ahmed, el-Hâc Ali b. Abdullah.