Bab Mahkemesi 54 Numaralı Sicil (H. 1102 / M. 1691) cilt: 20, sayfa: 88 Hüküm no: 55 Orijinal metin no: [8b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çelebi b. Mustafa’nın evdeki bir kısım hissesini Râbia bt. Zülfikar’a satması Mahmiye-i İstanbul’da Demirhan mahallesinde vâki‘ arsa Cündî Mehmed Ağa Vakfı’na ayda elli akçe icâreli vakıf ve ebniyesi mülk olup, bir tarafı Habib Çavuş mülkü ve bir tarafı Mimar İsmail Ağa mülkü ve bir tarafı Bezzâzistânî Mehmed Çelebi menzili ve bir tarafı tarîk-i âm ile mahdûd, dâhiliyesi dört bâb fevkānî oda ve bir mutfak ve iki sofa ve bahçe ve su kuyusu ve hâriciyesinde fevkānî iki oda ve bir sofayı müştemil menzilin mülk ebniyesinin ber-mûceb-i hüccet-i şer‘iyye [kırk] sekiz sehimden yedi sehmi mahmiye-i mezbûrede Üskübî mahallesinde sâkin Mehmed Çelebi b. Mustafa’nın mülk ve hakkı olduğu lede’ş-şer‘i’l-enver sâbit ve müte‘ayyin oldukdan sonra mezbûr Mehmed Çelebi meclis-i şer‘-i şerîf-i enverde, yine menzil-i mezbûrdan on iki sehme mâlike olan işbu bâ‘isetü’l-vesîka Râbia bt. el-Hâc Zülfikar tarafından husûs-ı âti’l-beyâna vekîl olup, bimâ-hüve nehcü’s-sübût şer‘an vekâleti sâbite olan Subaşı Osman Ağa b. Mustafa mahzarında ikrâr-ı tâm ve takrîr-i kelâm edip, menzil-i mahdûd-ı mezbûrda bâlâda tahsîl olunduğu minvâl üzre hisse-i şer‘iyyem olan kırk sekiz sehimden yedi sehm-i şâyi‘imi, bi cümleti’t-tevâbi‘ ve’l-levâhık mezbûre Râbia Hâtun’a üç yüz esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve temlîk ve teslîm ve arsadan hissemi izn-i mütevellîyle meccânen ferâğ ve tefvîz, ol dahi iştirâ ve tesellüm ve tefevvüz ve kabûl eyledikden sonra semeni olan meblağ-ı mezbûr üç yüz guruşu bi’t-tamâm ve’l-kemâl ahz u kabz ve tesellüm eyledim. Ba‘de’l-yevm hisse-i mezkûrem mezbûre Râbia Hâtun’un mülk-i müşterâsıdır. Menzil-i mezbûrda benim kat‘â alâka ve medhalim kalmamışdır dedikde, gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sânî ve’l-ışrîn min Cemâziyelevvel sene 1102. Şuhûdü’l-hâl: Haffâf Ömer Çelebi b. Osman, Habib Çavuş b. Mehmed, Ali Beşe b. Abdullah, Süleyman Çelebi b. ( ), Mumcu Ali Beşe b. ( ), Habib Ağa b. Receb Efendi, Ali Mehmed, Cafer b. Receb, Ömer Çelebi b. Abdullah, Süleyman b. Hasan.