Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 205 Hüküm no: 145 Orijinal metin no: [32b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Turşucu Ahmed Odabaşı’nın terekesinden Ayşe Hatun ile küçük çocuklar Saliha ve Ayşe’nin haklarını aldıkları Husûs-ı âti’l-beyanın mahâllinde ketb ü tahrîri için savb-ı şer‘-i enverden Mevlânâ İskilibî Mehmed Efendi irsâl olunup ol dahi mahmiye-i İstanbul’da Şeyh Hasan Paşa mahâllesinde sâkin iken bundan akdem vefât eden Tur[şu]cu Ahmed Odabaşı b. Abdullah’ın menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde müteveffâ-yı mezbûrun verâseti zevce-i menkûha-i metrûkesi Âişe Hatun bt. Osman ile sulbiye kebîre kızları Saliha Hatun ve Âişe’ye ve sulbiye sagīre kızı Hadîce’ye münhasıra ve tashîh-i meselesi yirmi dört sehmden olup sihâm-ı mezbûrenin üç sehmi zevce-i mezbûre Âişe Hatun’a ve yedişer sehmi mezbûrât Saliha Hatun ve Âişe ve Hadîce nâm sagīre isâbeti tahakkukundan sonra zâtı ta‘rîf-i şer‘î ile mu‘arrefe olan zevce-i mezbûre Âişe Hatun asâleten ve mezbûre Saliha Hatun’un zevci ve tarafından husûs-ı âti’l-beyanda müseccel vekîli Veli Ağa b. Mehmed vekâleten ve zâtı kezâlik ta‘rîf-i şer‘î ile mu‘arrefe olan mezbûre Âişe asâleten meclis-i ma‘kūd-ı mezkûrda sagīre-i mezbûre Hadîce’nin tesviye-i umûruna bâ-hüccet-i şer‘iyye vasiyy-i muhtârı olmağla terekesine bi’l-vesâye vâzı‘ü’l-yed olan işbu bâ‘isü’l-kitâb Süleyman Ağa b. Ali mahzarında her biri bi’l-asâle ve bi’l-vekâle ikrâr ve takrîr-i kelâm edip mûrisimiz müteveffâ-yı mezbûr Turşucu Ahmed Odabaşı’nın terekesi tahrîr ve ba‘de-ihrâci’l-masârıf ve’d-düyûn ber-mûceb-i defter-i kassâm-ı askerî hisselerimize isâbet eden vasiyy-i mezbûrun yedinde olan sekiz bin beş yüz akçeden zevce-i mezbûre Âişe Hatun’un sümün hissesine bin beş yüz akçe ve mezbûretân Saliha Hatun ve Âişe’nin hisselerine üçer bin beşer yüz akçeyi vasiyy-i mezbûr Süleyman Ağa bize def‘ u teslîm biz dahi asâleten ve vekâletimiz hasebiyle vasiyy-i mezbûr yedinden meblağ-ı mecmû‘-ı mezbûr sekiz bin beş yüz akçeyi tamâmen ahz u kabz eyledik min-ba‘d meblağ-ı mecmû‘-ı mezbûr sekiz bin beş yüz akçeden vasiyy-i mezbûr Süleyman Ağa yedinde ve zimmetinde bir akçe ve bir habbe bâkī kalmadı dediklerinde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ba‘dehû ma‘an irsâl olunan Hüseyin Çelebi b. Mehmed ve Salih Çelebi b. Halil ile meclis-i şer‘a gelip alâ-vuku‘ihî inhâ etmeğin mâ-vaka‘a bi’t-taleb ketb olundu. Fî 28 min-Cumâdelûlâ sene 1143. Şuhûdü’l-hâl: Derviş Mehmed Efendi b. Mehmed Emin, Yusuf Efendi b. Abdurrahman, el-Hâc Hasan Efendi b. Ali, Hüseyin Odabaşı b. Mehmed, Mustafa Odabaşı b. Hasan, Hüseyin Beşe b. Mahmud