Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 206 Hüküm no: 146 Orijinal metin no: [33a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Terzi Avanos’un Turşucu Ahmed Odabaşı’ya olan borcunu hayattayken ödemiş olduğu Husûs-ı âti’l-beyanın mahâllinde istimâ‘ ve tahrîri için savb-ı şer‘-i enverden mezûnen Mevlânâ İskilibî Mehmed Efendi irsâl olunup ol dahi mahmiye-i İstanbul’da Şeyh Hasan Paşa mahâllesinde sâkin iken bundan akdem vefât eden Turşucu Ahmed Odabaşı b. Abdullah’ın menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde müteveffâ-yı mezbûrun sulbiye sagīre kızları Âişe ve Hadîce’nin tesviye-i emrlerine bâ-hüccet-i şer‘iyye vasiyy-i muhtârları olmağla terekesine bi’l-vesâye vâzı‘ü’l-yed olan Süleyman Ağa b. Ali meclis-i ma‘kūd-ı mezbûrda Pirinçci Sinan odalarında mütemekkin terzi tâifesinden bâ‘isü’s-sifr Avanos v. Haçador nâm zimmî mahzarında üzerine da‘vâ ve takrîr-i kelâm edip bin yüz kırk senesi Muharremü’l-haramı gurresi târîhiyle müverrah mümzâ ve mahtûm deyn temessükü mûcebince müteveffâ-yı mezbûrun mesfûr Avanos zimmetinde cihet-i karz-ı şer‘îden elli guruş hakkı olup meblağ-ı mezbûru kable’l-ahz fevt olmağla mesfûr Avanos’dan bi’l-vesâye taleb ederim suâl olunsun dedikde gıbbe’s-suâl mesfûr Avanos cevâbında meblağ-ı mezbûr elli guruşu müteveffâ-yı mezbûr cihet-i karz-ı şer‘îden deyni olduğunu ikrâr lâkin müteveffâ-yı mezbûr Turşucu Ahmed Odabaşı b. Abdullah b. Abdullah hâl-i hayâtında fevtinden iki sene mukaddem deynim olan meblağ-ı mezbûr elli guruşu huzûr-ı Müslimînde kendüye tamâmen def‘ ve teslîm eyledim ol dahi yedimden ahz u kabz edip meblağ-ı mezbûr elli guruşdan zimmetim berî olmuşdur deyü def‘le mukābele edicek gıbbe’l-istintâk ve’l-inkâr mesfûr Avanos zimmîden def‘-i meşrûhuna beyyine taleb olundukda udûl-i ahrâr-ı ricâl-i Müslimînden olup mahmiye-i mezbûrede Akşemseddin mahâllesinde sâkin Çukadâr Mehmed Ağa b. Abdullah ve Halil Beşe b. Mehmed li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-vâki‘ işbu mesfûr Terzi Avanos zimmî müteveffâ-yı mezbûr Turşucu Ahmed Odabaşı b. Abdullah b. Abdullah’a deyni olan elli guruşu hâl-i hayâtında fevtinden iki sene mukaddem edâ ve teslîm edip müteveffâ-yı mezbûr dahi mesfûr yedinden tamâmen ahz u kabz eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm vâki‘ hâli mevlânâ-yı mezbûr mahâllinde tahrîr ba‘dehû ma‘an mürsel Hüseyin Çelebi b. Mehmed ve Salih Çelebi b. Halil ile meclis-i şer‘a gelip alâ-vuku‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sânî ve’l-ışrîn min-Cumâdelâhire sene 1143. Şuhûdü’s-sâbıkūn