Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 207 Hüküm no: 148 Orijinal metin no: [33a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Turşucu Ahmed Odabaşı’nın hanımının aldığı altınlar kendine ait olduğundan terekeye dahil edilmediği Kezâlik akd-i meclis-i şer‘-i şerîf ettikde müteveffâ-yı mezbûrun sulbiye sagīre kızı Hadîce’nin tesviye-i umûruna bâ-hüccet-i şer‘iyye vasiyy-i muhtârı olmağla terekesine bi’l-vesâye vâzı‘ü’l-yed olan Süleyman Ağa b. Ali meclis-i ma‘kūd-ı mezbûrda müteveffâ-yı mezbûrun zevce-i menkûha-i metrûkesi olup zâtı ta‘rîf-i şer‘î ile mu‘arrefe olan bâ‘isü’l-kitâb Âişe Hatun bt. Osman mahzarında bi’l-vesâye üzerine da‘vâ ve takrîr-i kelâm edip müteveffâ-yı mezbûrun hâl-i marazında fevtinden bir gün mukaddem zevce-i mezbûre Âişe Hatun bin yüz elli guruşluk fındık altını bi-gayrı hakkın ahz u kabz etmekle meblağ-ı mezbûru defter-i kassâma idhâl murâd eylediğimde mezbûre Âişe Hatun imtinâ‘ eder, suâl olunsun dedikde gıbbe’s-suâl zevce-i mezbûre Âişe Hatun cevâbında zevcim müteveffâ-yı mezbûr Turşucu Ahmed Odabaşı b. Abdullah b. Abdullah hâl-i hayâtında fevtinden bir sene mukaddem tarafımdan vekîlim olmağla dâmâdım gāib ani’l-meclis Mustafa Ağa b. Mehmed ile beynimizde ma‘lûm menzil semeninden bin yüz elli guruşu bi’l-vekâle kabz ve masârıfına sarf ile istihlâk eyledim deyü târîh-i merkūmda huzûr-ı Müslimînde ikrâr ve işhâd edip zevcim müteveffâ-yı mezbûrun hâl-i marazında fevtinden bir gün mukaddem tarafımdan bi’l-vekâle makbûz olup bana deyni olan meblağ-ı mezbûr bin yüz elli guruşun beş yüz guruşluk beyaz akçe ve altı yüz elli guruşluk fındık altınını yedime def‘ u teslîm edip ben dahi ber-vech-i muharrer hakkım olan meblağ-ı mezbûr bin yüz elli guruşu yedinden tamâmen ahz u kabz eyledim deyü def‘le mukābele edicek gıbbe’l-istintâk ve’l-inkâr zevce-i mezbûre Âişe Hatun’dan def‘-i meşrûhuna beyyine taleb olundukda udûl-i ahrâr-ı ricâl-i Müslimînden olup Dergâh-ı âlî yeniçerilerinin dokuzuncu bölük odası neferâtının hâlâ oda bekçisi olan Hüseyin Odabaşı Ağa b. Mehmed ve Yusuf Efendi b. Abdurrahman ve es-Seyyid Ahmed b. el-Hâc Mehmed ve Mustafa Odabaşı b. Hasan li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-vâki‘ müteveffâ-yı mezbûr Turşucu Ahmed Odabaşı b. Abdullah b. Abdullah hâl-i hayâtında fevtinden bir sene mukaddem zevcesi mezbûre Âişe Hatun tarafından bi’l-vekâle mezbûre Âişe Hatun’un dâmâdı gāib ani’l-meclis Mustafa Ağa b. Mehmed ile beynlerinde ma‘lûm menzil semeninden bin yüz elli guruşu zevcesi tarafından bi’l-vekâle kabz ve masârıfına sarf ile istihlâk etmekle meblağ-ı merkūm bin yüz elli guruş hâlâ zimmetimde deynimdir deyü fevtinden bir sene mukaddem huzûrumuzda ikrâr ve bizi işhâd ve beyan eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle vasiyy-i mezbûr husûs-ı mezkûra (...) mezbûre Âişe Hatun ile bî-vech mu‘ârazadan men‘ olunduğu mevlânâ-yı mezbûr mahâllinde ilâ-âhırihî. Fi’t-târîhi’l-mezbûr li-seneti’l-merkūme. Şuhûdü’s-sâbıkūn