Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 209 Hüküm no: 149 Orijinal metin no: [33b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gedikli Kâtibi İbrahim Efendi’nin reşid olmayan oğlu İbrahim Ağa’ya nafaka takdiri Mahmiye-i İstanbul’da Şeyh Ebulvefâ mahâllesinde sâkin iken bundan akdem vefât eden Gedikli Kâtibi İbrahim Efendi b. Muslı’nın sulbî kebîr oğlu gayr-ı reşîd İbrahim Ağa’nın tesviye-i umûruna kıbel-i şer‘den vasî nasb olunan işbu bâ‘isü’l-kitâb Mehmed Ağa b. Mehmed talebiyle hâkim-i muvakkı‘-ı sadr-ı kitâb bi-tevkī‘ihi’r-refî‘i’l-müstetâb tûbâ-lehû ve hüsnü-meâb efendi hazretleri mezbûr İbrahim Ağa’ya ve hâdim ve hâdimesine ze‘âmeti mahsûlünden târîh-i kitâbdan beher yevm yüz elli akçe nafaka ve kisve-baha farz ve takdîr buyurup meblağ-ı mefrûz beher yevm yüz elli akçeyi mezbûr İbrahim Ağa ve hâdim ve hâdimelerinin nafaka ve kisve-baha ve sâir levâzım-ı zarûriyelerine harc u sarfa ve vakt-i hâcetde istidâneye ve lede’z-zafer mâlına rücû‘a dahi mezbûr Mehmed Ağa’ya izin birle mâ-vaka‘a bi’t-taleb ketb olundu. Fî-gurreti Cumâdelâhire sene 1143. Şuhûdü’l-hâl: İshak Efendi b. el-Hâc Abdullah imam, Mustafa Ağa b. Ali, İbrahim Ağa b. Abdullah, Ahmed Efendi b. Mehmed, Hoca Mehmed Efendi b. Hüseyin, Kahveci İbrahim Ağa b. Ahmed, Hasan Ağa b. Süleyman