Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 209 Hüküm no: 150 Orijinal metin no: [33b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Çelebi’nin babasından kalan haklarını vasisi olan dedesinden tamamen aldığı Husûs-ı âti’l-beyanın mahâllinde ketb ü tahrîri için bi’l-iltimâs savb-ı şer‘-i enverden Mevlânâ es-Seyyid Mahmud Efendi irsâl olunup ol dahi mahmiye-i İstanbul’da Ali Fakih mahâllesinde sâkin Mustafa Çelebi b. Ali’nin menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde mahâlle-i mezbûrede sâkin iken bundan esbak vefât eden Ömer Beşe b. el-Hâc Mehmed’in sulbî kebîr oğlu Mehmed Çelebi b. (°) meclis-i ma‘kūd-ı mezkûrda min-kıbeli’l-eb ceddi ve hâl-i sıgārında tesviye-i umûruna kıbel-i şer‘den mansûb vasîsi olmağla hisse-i müntakılesine bi’l-vesâye vâzı‘ü’l-yed olan bâ‘isü’l-kitâb mezbûr el-Hâc Mehmed b. Ali mahzarında ikrâr ve takrîr-i kelâm edip babam müteveffâ-yı mezbûrun terekesinden ber-mûceb-i defter-i kassâm-ı askerî hisseme isâbet edip vasiyy-i mezbûrun bi’l-vesâye makbûzu olan iki yüz otuz dört ile kezâlik babam müteveffâ-yı mezbûrdan intikāl edip mahâlle-i mezbûre Avârız Vakfı’ndan mezbûr el-Hâc Mehmed’e bâ-ma‘rifet-i mütevellî ferâğ eylediğim üç sehim i‘tibâr olunan menzilden bir sehim hisse-i şâyi‘am bedeli olan iki bin dört yüz akçe ki cem‘an iki bin altı yüz otuz dört akçeyi vasiyy-i mezbûr el-Hâc Mehmed bana tamâmen def‘ u teslîm ben dahi babam müteveffâ-yı mezbûr Ömer Beşe’nin terekesinden olmak üzere yedinden alıp kabz eyledim min-ba‘d meblağ-ı mezbûr iki bin altı yüz otuz dört akçeden vasiyy-i mezbûr el-Hâc Mehmed yedinde bir akçe ve bir habbe bâkī kalmayıp babam müteveffâ-yı mezbûrun terekesinden vasiyy-i mezbûr el-Hâc Mehmed’in zamân-ı vesâyetinde bi’l-cümle makbûz ve masrûfuna müte‘allıka âmme-i de‘âvî ve mutâlebât ve kâffe-i eymân ve muhâsamâtdan ceddim merkūm el-Hâc Mehmed’in zimmetini ibrâ-i âmm-ı râfi‘ü’l-hısâm ile ibrâ ve ıskāt eyledim, husûs-ı merkūma müte‘allıka vechen mine’l-vücûh ve sebeben mine’l-esbâb da‘vâ ve nizâ‘ım kalmadı dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ba‘dehû ma‘an irsâl olunan el-Hâc İbrahim b. Hüseyin ve Mehmed b. Abdullah ile meclis-i şer‘a gelip alâ-vuku‘ihî inhâ ve takrîr etmeğin mâ-vaka‘a bi’t-taleb ketb olundu. Fî 10 min-Cumâdelâhire sene 1143. Şuhûdü’l-hâl: Mustafa Çelebi b. Ali, es-Seyyid el-Hâc Abdullah b. es-Seyyid Mehmed, Mehmed Efendi b. Ahmed, Ali Bey b. Mehmed, İmam Mehmed Efendi b. Hasan, Ahmed Efendi b. İmam Mustafa, Mehmed Çelebi b. Mustafa, Ahmed Efendi kazzâz