Bab Mahkemesi 54 Numaralı Sicil (H. 1102 / M. 1691) cilt: 20, sayfa: 88 Hüküm no: 56 Orijinal metin no: [9a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mardiros v. Serkis’in kölesini bakıp gözettiği Meldon v. Serkis’deki alacağında sulh olduğu Mahmiye-i İstanbul’da Kumkapı’da sâkin Mardiros v. Serkis nâm zimmî meclis-i şer‘-i şerîf-i enverde, bâ‘isü’l-vesîka Meldon v. Serkis nâm [zimmî] muvâcehesinde ikrâr ve takrîr-i kelâm edip, merkūm Meldon târih-i kitâbdan üç sene mukaddem Bedros nâm abd-i memlûkünü bana infâk ve ihsân eylemek için vaz‘ ve teslîm edip, ben dahi merkūmun emrine binâ’en mezbûr Bedros’a yirmi sekiz ay kendi mâlımdan üç bin akçe harc ve sarf etmişdim deyu bundan akdem merkūm Meldon’dan taleb ve da‘vâ eylediğimde, beynimizde nizâ‘-ı küllî vukū‘undan sonra muslihûn tavassut edip merkūm Melkon ile beni bin dört yüz akçe üzerine sulh eylediklerinde, ben dahi sulh-ı mezbûru kabûl ve bedel-i sulh olan meblağ-ı mezbûr bin dört yüz akçemi merkūm Meldon yedinden tamâmen ahz u kabz edip, bin altı yüz akçesinden merkūm Meldon’un zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâdis ve’l-ışrîn min Cemâziyelevvel sene 1102. Şuhûdü’l-hâl: Ali Çelebi b. Ahmed, İbrahim Çelebi b. Ahmed, Nasuh b. Osman, el-Hâc Ali b. Abdullah, Mustafa Çelebi b. Şaban.