Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 214 Hüküm no: 156 Orijinal metin no: [34b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerbetçi Hasan Beşe’nin vefatıyla hanımı Zeynep Hatun’un terekeden hakkını aldığı Husûs-ı âti’l-beyanın mahâllinde ketb ü tahrîri iltimâs olunmağın savb-ı şer‘-i enverden Mevlânâ Şeyhzâde Abdülkerim Efendi irsâl olunup ol dahi mahmiye-i İstanbul’da Davudpaşa mahâllesinde sâkin iken bundan akdem vefât eden Şerbetçi Hasan Beşe b. Abdullah’ın menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde müteveffâ-yı mezbûrun verâseti zevce-i menkûha-i metrûkesi Zeyneb Hatun bt. Abdullah ile sulbiye kebîre kızı Afife Hatun’a münhasıra ve tashîh-i meselesi bi-hükmi’l-kavl sekiz sehmden olup sihâm-ı mezbûrenin bir sehmi zevcesi mezbûre Zeyneb Hatun’a ve bâkī yedi sehmi farzan ve redden kızı mezbûre Afife Hatun’a isâbeti tahakkukundan sonra zâtı el-Hâc Mehmed b. Ali ve Ahmed Çelebi b. Mahmud ta‘rîfleriyle mu‘arrefe olan zevce-i mezbûre Zeyneb Hatun bt. Abdullah meclis-i ma‘kūd-ı mezkûrda tereke-i müteveffâ-yı mezbûra bi’l-verâse vâzı‘atü’l-yed olup kezâlik zâtı ta‘rîf-i şer‘î ile mu‘arrefe olan işbu bâ‘isetü’l-kitâb mezbûre Afife Hatun mahzarında ikrâr-ı tâm ve takrîr-i kelâm edip zevcim müteveffâ-yı mezbûr Hasan Beşe’nin terekesi tahrîr ve ba‘de-ihrâci’l-masârıf ber-mûceb-i defter-i müfredât eşyâ-i mebî‘a semeninden tashîh-i mezbûr üzere bana isâbet eden üç bin altı yüz seksen sekiz akçe ile işbu akd-i meclis olunan mülk menzilin nısfı bâ-hüccet-i şer‘iyye mezbûre Afife Hatun’un mülkü ve nısf-ı âharı dahi zevcim müteveffâ-yı mezbûrun ile’l-vefât yedinde mülkü olmağla müteveffâ-yı mezbûr zimmetinde mütekarrer ve ma‘kūdün-aleyh mehr-i müeccel-i müsbet hakkım olan beş bin akçe ki cem‘an on dört bin seksen sekiz akçeyi terekeden olmak üzere mezbûre Afife Hatun işbu meclis-i ma‘kūdda bana tamâmen def‘ u teslîm ben dahi terekeden olmak üzere yedinden bi’t-tamâm ve’l-kemâl alıp kabz eyledim ba‘de’l-yevm meblağ-ı mezkûr on dört bin seksen sekiz akçeden mezbûrenin yedinde bir akçe ve bir habbe bâkī kalmayıp zevcim müteveffâ-yı mezbûrun şerbetçi dükkânında mevcûde eşyâ ve nukūdundan mâ‘adâ zikr olunan eşyâ-i mebî‘a ve nısf menzil-i mezbûra müte‘allıka mezbûre Afife Hatun ile vechen mine’l-vücûh ve sebeben mine’l-esbâb da‘vâ ve nizâ‘ım yokdur dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ba‘dehû ma‘an mürsel Çukadâr el-Hâc Ahmed b. Abdullah ve el-Hâc İbrahim b. Osman ile meclis-i şer‘a gelip alâ-vuku‘ihî inhâ ve takrîr etmeğin mâ-vaka‘a bi’t-taleb ketb olundu. Fî 11 min-Cumâdelâhire sene 1143. Şuhûdü’l-hâl: Hâfız Ahmed Efendi b. İbrahim el-imâm, Hammâmî Ömer? Çelebi b. Abdullah, Süleyman Çavuş b. Abdullah, el-Hâc Abdullah Efendi b. İbrahim, el-Hâc Mehmed b. Ali, Mustafa Bey b. Mehmed, Hasan b. Hüseyin