Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 215 Hüküm no: 157 Orijinal metin no: [34b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed b. Mahmud’un oğullarına yeni vasi tayini Mahmiye-i İstanbul’da Nahılbend mahâllesinde sâkin iken bundan akdem vefât eden es-Seyyid el-Hâc Ahmed b. Mahmud’un sulbî sagīr oğulları es-Seyyid Süleyman ve es-Seyyid Mahmud’un vasiyy-i şer‘îleri es-Seyyid Mehmed Çelebi b. Ahmed fevt olup hizmet-i vesâyet hâlî ve mu‘attal kalmağla yerine sagīrân-ı mezbûrânın tesviye-i emrlerine kıbel-i şer‘den bir vasî nasbı lâzım ve mühim olmağın emânet ve diyânet [ile] ma‘rûfe ve mevsûfe ve her vechile vesâyet uhdesinden gelmeye kādire idiği zeyl-i kitâbda muharrerü’l-esâmi Müslimîn haberleriyle lede’ş-şer‘i’l-enver zâhir olan sagīrân-ı mezbûrânın vakt-i rüşd ü sedâdlarına varınca tesviye-i emrlerine vasî nasb u ta‘yîn buyurduklarında ol dahi vesâyet-i mezbûreyi kabûl ve merâsimini edâya ta‘ahhüd ve iltizâm <> ettikden sonra vasiyy-i mezbûr talebiyle hâkim-i mûmâ-ileyh efendi hazretleri sagīrân-ı mezbûrânın babaları müteveffâ-yı mezbûrdan müntakil mâllarından her birine beher yevm sekizer akçe nafaka ve kisve-baha farz ve takdîr buyurup meblağ-ı mefrûz-ı mezbûr cem‘an on altı akçeyi sagīrân-ı mezbûrânın nafaka ve kisve ve sâir levâzım-ı zarûriyelerine harc u sarfa ve vakt-i hâcetde istidâneye ve lede’z-zafer mâllarına rücû‘a vasiyy-i mezbûreye izin birle mâ-vaka‘a bi’t-taleb ketb olundu. Fî 15 min-Cumâdelâhire sene 1143. Şuhûdü’l-hâl: Es-seyyid Hasan Efendi b. Mahmud, el-Hâc Hüseyin b. Abdullah, Ali Ağa b. el-Hâc Mahmud, Ahmed Çelebi b. Mehmed, Mehmed Çelebi b. Ahmed