Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 216 Hüküm no: 158 Orijinal metin no: [34b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman Odabaşı’nın vefatından önce vasiyetini yerine getirmek üzere Süleyman Çelebi’yi vasi tayin ettiği Husûs-ı âti’l-beyanın mahâllinde istimâ‘ ve tahrîri için savb-ı şer‘-i enverden mezûnen Mevlânâ Mehmed Efendi b. Osman irsâl olunup ol dahi mahmiye-i İstanbul’da Seydi Ömer mahâllesinde sâkin iken bundan akdem vefât eden Süleyman Odabaşı b. Ahmed’in menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde [35a] müteveffâ-yı mezbûrun verâseti zevce-i menkûha-i metrûkesi Fâtıma Hatun bt. Mehmed ile sulbiye sagīre kızı Âişe’ye ve li-ebeveyn er karındaşı oğlu olup vilâyet-i Anadolu’da Kütahya kasabasında sâkin Halil b. Abdullah nâm gāibe münhasıra olduğu şer‘an zâhir ve nümâyân oldukdan sonra müteveffâ-yı mezbûrun ber-vech-i âtî vasiyy-i muhtârı olduğunu iddi‘â eden bâ‘isü’l-kitâb Süleyman Çelebi b. Mustafa meclis-i ma‘kūd-ı mezkûrda müteveffâ-yı mezbûrun zevce-i menkûha-i metrûkesi olmağla terekesine bi’l-verâse vâzı‘atü’l-yed olup zâtı ta‘rîf-i şer‘î ile mu‘arrefe olan mezbûre Fâtıma Hatun mahzarında üzerine da‘vâ ve takrîr-i kelâm edip müteveffâ-yı mezbûr Süleyman Odabaşı b. Ahmed b. Abdullah hâl-i marazında fevtinden bir gün mukaddem bi-emrillâhi te‘âlâ vefât eylediğimde cemî‘ terekem ve zimem-i nâsda olan hukūkum ahz u kabz ve vech-i mesnûn üzere levâzım-ı techîz ve tekfînim görülüp düyûn-ı müsbetem kazâ olundukdan sonra bâkī kalan terekemin sülüsünden üç bin akçe ıskāt-ı salâtım için fukarâya tasadduk oluna ve kadr-ı ma‘rûf meblağ ile eyyâm-ı mübârekede tabh-ı ta‘âm ve it‘âm-ı fukarâ oluna ve otuz beş guruş ile ta‘mîr-i kabrim oluna deyü vasiyet edip tenfîzine ve sulbiye sagīre kızı Âişe’nin tesviye-i umûruna gāib-i mezbûr Halil’in hisse-i ırsiyesini ahz u kabz ve zabt u hıfza huzûr-ı Müslimînde beni vasiyy-i muhtâr nasb u ta‘yîn ettikde ben dahi muvâcehesinde ba‘de’l-kabûl musırran-aleyhâ fevt oldukda terekesinin sülüsü meblağ-ı mûsâ-bih-i mezkûra müsâ‘id olmağla tenfîz-i vesâyâ murâd eylediğimde mezbûre Fâtıma Hatun mâni‘a olur suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-i ahrâr-ı ricâl-i Müslimînden olup Dergâh-ı âlî yeniçerilerinin dokuzuncu sekbânlara mahsûs odada sâkin Ebubekir Odabaşı b. Ömer ve Ömer Beşe b. Hüseyin li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka müteveffâ-yı mezbûr Süleyman Odabaşı b. Ahmed b. Abdullah hâl-i marazında fevtinden bir gün mukaddem bi-emrillâhi te‘âlâ vefât eylediğimde cemî‘ terekem ve zimem-i nâsda olan hukūkum ahz u kabz ve vech-i mesnûn üzere levâzım-ı techîz ve tekfînim görülüp düyûn-ı müsbetem kazâ olundukdan sonra bâkī kalan terekenin sülüsünden üç bin akçe ıskāt-ı salâtım için fukarâya tasadduk oluna ve kadr-ı ma‘rûf meblağ ile eyyâm-ı mübârekede tabh-ı ta‘âm ve it‘âm-ı fukarâ oluna ve otuz beş guruş ile ta‘mîr-i kabrim oluna deyü vasiyet edip tenfîzine ve sulbiye sagīre kızı Âişe’nin tesviye-i umûruna ve gāib-i mezbûr Halil’in hisse-i ırsiye-i şer‘iyyesini ahz u kabz ve zabt u hıfza huzûrumuzda işbu müdde‘î-i mezbûr Süleyman Çelebi’yi vasî nasb u ta‘yîn ettikde ol dahi muvâcehesinde ba‘de’l-kabûl musırran-aleyhâ fevt oldukda terekesinin sülüsü meblağ-ı mûsâ-bih-i mezkûra müsâ‘iddir biz bu husûsa bu vech üzere şâhidleriz şehâdet dahi ederiz deyü her biri şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm vâki‘ hâli mevlânâ-yı mezbûr mahâllinde tahrîr ve ba‘dehû ma‘an mürsel el-Hâc Mehmed b. Ahmed ve Mustafa Çelebi b. el-Hâc Hasan ile meclis-i şer‘a gelip alâ-vuku‘ihî inhâ ve takrîr etmeğin mâ-vaka‘a bi’t-taleb ketb olundu. Fî 9 min-Cumâdelâhire sene 1143. Şuhûdü’l-hâl: el-Hâc Süleyman b. Osman, Mustafa Beşe b. Ahmed, Molla Numan b. İbrahim, Molla İbrahim b. Ahmed, Ömer Beşe b. Hüseyin