Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 217 Hüküm no: 159 Orijinal metin no: [35a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Süleyman Efendi’nin kardeşi olan Halil Efendi’nin terekede hakkı olduğu Mahmiye-i İstanbul’da Cafer Ağa mahâllesinde sâkin iken bundan akdem vefât eden Süleyman Efendi b. Mehmed’in li-ebeveyn er karındaşı ve usûbet-i nesebiye cihetinden vech-i âtî vârisi olduğunu iddi‘â eden bâ‘isü’l-kitâb Halil Efendi meclis-i şer‘-i şerîf-i enverde müteveffâ-yı mezbûrun sulbiye sagīre kızı Hanife’nin tesviye-i umûruna bâ-hüccet-i şer‘iyye vasiyy-i muhtârı olmağla terekesine bi’l-vesâye vâzı‘ü’l-yed olan Mahmud Efendi b. el-Hâc İbrahim mahzarında üzerine da‘vâ ve takrîr-i kelâm edip müteveffâ-yı mezbûr Süleyman Efendi benim ile li-ebeveyn karındaş olup babamız ismi Mehmed, dedemiz ismi Süleyman, vâlidemiz ismi Emine bt. Halil, maskat-ı re’simiz vilâyet-i Anadolu’da Eskişehir kasabasında Orta mahâllesi olup müteveffâ-yı mezbûrun verâseti sulbiye kebîre kızları Fâtıma ve Âişe ve sagīre kızı mezbûre Hanife’ye ve usûbet-i nesebiye cihetinden bana ve li-ebeveyn kız karındaşlarım olup zikr olunan Orta mahâllede sâkineler Hadîce ve Rabiülhan nâm hatunlara münhasıra ve tashîh-i meselesi otuz altı sehmden olup sihâm-ı mezbûrenin sekizer sehmi kızları mezbûretândan her birine ve bâkī on iki sehmin altı sehmi bana ve üçer sehmi kız karındaşlarım mezbûretân Hadîce ve Rebiülhan’dan her birine isâbet edip zikr olunan altı sehme cihet-i mezbûreden benden gayrı vâris ve müstahakk-ı âhar olmamağla hisse-i ırsiyemi vasiyy-i mezbûrdan taleb eylediğimde bana teslîmden imtinâ‘ eder suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-i ahrâr-ı ricâl-i Müslimînden zikr olunan Cafer Ağa mahâllesinde sâkin Abdullah Çelebi b. Osman ve Teberdâr Mehmed Bey b. Mesud li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müteveffâ-yı mezbûr Süleyman Efendi ile işbu müdde‘î-i mezbûr Halil Efendi li-ebeveyn karındaşlar olup babaları ismi Mehmed ve dedeleri ismi Süleyman vâlideleri ismi Emine bt. Halil maskat-ı re’sleri vilâyet-i Anadolu’da Eskişehir kasabasında Orta mahâllesi olup müteveffâ-yı mezbûrun verâseti sulbiye kebîre kızları Fâtıma ve Âişe ve sagīre kızı Hanife’ye ve usûbet-i nesebiye cihetinden işbu müdde‘î-i mezbûr Halil Efendi’ye ve li-ebeveyn kız karındaşları olup zikr olunan Orta mahâllede sâkineler Hadîce ve Rebiülhan nâm hatunlara münhasıra ve tashîh-i meselesi otuz altı sehmden olup sihâm-ı mezbûrenin sekizer sehmi kızları mezbûretândan her birine ve bâkī on iki sehmin altı sehmi işbu müdde‘î-i mezbûr Halil Efendi’ye ve üçer sehmi kız karındaşları mezbûretân Hadîce ve Rebiülhan’dan her birine isâbet edip zikr olunan altı sehme cihet-i mezbûreden müdde‘î-i mezbûrdan gayrı vâris ve müstahakk-ı âhar olduğu ma‘lûmumuz değildir biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm mâ-vaka‘a bi’t-taleb ketb olundu. Fî 15 Cumâdelâhire sene 1143. Şuhûdü’l-hâl: Mehmed Bey b. Mesud şâtır, Abdullah Çelebi b. Osman, es-Seyyid Ahmed Efendi b. el-Hâc Yusuf hatîb, Abdurrahman Efendi b. Hüseyin el-müezzin, Salih Efendi b. el-Hâc Abdi