Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 219 Hüküm no: 161 Orijinal metin no: [35b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim ve Abdurrahman’a miras kalan paradan babaları Mehmed’in borç aldığı Husûs-ı âti’z-zikrin mahâllinde ketb ü tahrîri için savb-ı şer‘-i enverden irsâl olunan Mevlânâ Mehmed Efendi b. İbrahim mahmiye-i İstanbul’da Bezzâzistân-ı atikde vâki‘ mustahfızlara mahsûs odaya varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde mahmiye-i mezbûrede Sarı Bâyezid mahâllesinde sâkine iken bundan akdem vefât eden Hadîce Hatun bt. Abdullah’ın sadrî sagīr oğulları İbrahim ve Abdurrahman’ın babaları ve velîleri el-Hâc Mehmed b. Mustafa meclis-i ma‘kūd-ı mezkûrda sagīrân-ı mezbûrâna tashîhan li’s-sâk vasî ve kayyım nasb olunan bâ‘isü’l-kitâb es-Seyyid el-Hâc Hasan b. Ahmed mahzarında ikrâr ve takrîr-i kelâm edip sagīrân-ı mezbûrânın vâlideleri müteveffât-ı mezbûreden müntakil mâllarından olmak üzere vasiyy-i mezbûr yedinden istidâne ve kabz eylediğim üç yüz yetmiş altı guruş deynimi târîh-i kitâbdan üç yüz altmış bir gün tamâmına değin müeccel ve mev‘ûd vasiyy-i mezbûr yedinden iştirâ ve kabz eylediğim bir kıt‘a Mushaf-ı şerîf hediyesinden dahi otuz sekiz guruş ki cem‘an dört yüz on dört guruş müeccel ve mev‘ûd sagīrân-ı mezbûrân İbrahim ve Abdurrahman’a zimmetimde vâcibü’l-edâ deynimdir dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ba‘dehû ma‘an irsâl olunan el-Hâc İbrahim b. Hüseyin ve Mehmed Çelebi b. Ali ile meclis-i şer‘a gelip alâ-vuku‘ihî inhâ ve takrîr etmeğin mâ-vaka‘a bi’t-taleb ketb olundu. Fî 10 min-Cumâdelâhire sene 1143. Şuhûdü’l-hâl: el-Hâc Mehmed Ağa b. Mustafa, Ahmed Beşe b. Mehmed, Halil Çelebi b. Osman, el-Hâc Ali b. Abdullah, el-Hâc Şahin b. Abdullah, Mehmed Çelebi b. Ali