Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 221 Hüküm no: 163 Orijinal metin no: [36a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa ve Ayşe Hatun’un hayattayken Süleyman Çelebi’ye verdikleri borçları terekeden talep ettikleri Husûs-ı âti’l-beyanın mahâllinde istimâ‘ ve tahrîri için savb-ı şer‘-i enverden mezûnen mevlânâ-yı Bursa Mehmed Efendi irsâl olunup ol dahi mahmiye-i İstanbul’da Küçük Ayasofya Câmi‘-i şerîfi kurbünde Hüseyin Ağa mahâllesinde sâkin iken bundan akdem vefât eden Süleyman Çelebi b. Mehmed’in menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde mahâlle-i mezbûrede sâkin bâ‘isü’l-kitâb Hammâmî Mehmed Ağa b. Musa meclis-i ma‘kūd-ı mezkûrda müteveffâ-yı mezbûrun vesâyâsını tenfîze bâ-hüccet-i şer‘iyye vasiyy-i muhtârı olmağla terekesine bi’l-vesâye vâzı‘ü’l-yed olan İsmail Ağa b. Mehmed ile müteveffâ-yı mezbûrun zevce-i menkûha-i metrûkesi Hadîce Hatun bt. Abdullah’ın vekîl-i müsecceli diğer İsmail Çelebi b. Abdi mahzarlarında üzerlerine da‘vâ ve takrîr-i kelâm edip müteveffâ-yı mezbûr Süleyman Çelebi b. Mehmed b. Ali zimmetinde cihet-i karz-ı şer‘îden elli beş guruş hakkım olup hattâ müteveffâ-yı mezbûr hâl-i hayâtında meblağ-ı mezbûr cihet-i mezbûreden zimmetinde bana vâcibü’l-edâ deyni olduğunu huzûr-ı Müslimînde ikrâr ve işhâd edip kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr mahâlle-i mezbûrede sâkine Âişe Hatun bt. İvaz meclis-i mezbûrda mezbûrân İsmail Ağa ve diğer İsmail Ağa mahzarlarında üzerlerine da‘vâ ve takrîr-i kelâm edip müteveffâ-yı mezbûr Süleyman Çelebi b. Mehmed b. Ali zimmetinde cihet-i karz-ı şer‘îden elli guruş hakkım olup hattâ müteveffâ-yı mezbûr hâl-i hayâtında meblağ-ı mezbûr cihet-i mezbûreden zimmetinde bana vâcibü’l-edâ deyni olduğunu huzûr-ı Müslimînde ikrâr ve işhâd edip kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘iyân-ı mezbûrândan müdde‘âlarına beyyine taleb olundukda udûl-i ahrâr-ı ricâl-i Müslimînden mahâlle-i mezbûrede sâkin Mustafa Efendi b. eş-Şeyh Abdüllatif Efendi ve Abdullah Ağa b. Mehmed ve Abdurrahman Ağa b. Mehmed li-ecli’ş-şehâde meclis-i ma‘kūd-ı mezkûra hâzirûn olup isre’l-istişhâd fi’l-hakīka müteveffâ-yı mezbûr Süleyman Çelebi b. Mehmed b. Ali hâl-i hayâtında işbu müdde‘î-i evvel mezbûr Hammâmî Mehmed Ağa’ya cihet-i karz-ı şer‘îden elli beş guruş ve müdde‘iye-i sânî mezbûre Âişe Hatun’a kezâlik cihet-i karz-ı şer‘îden elli guruş zimmetinde vâcibü’l-edâ deyni olduğunu huzûrumuzda ikrâr ve bizi işhâd eyledi, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın müdde‘iyân-ı mezbûrândan her biri vech-i şer‘î üzere tahlîf olunup mûcebiyle ba‘de’l-hükm vâki‘ hâli mevlânâ-yı mezbûr mahâllinde tahrîr ve ma‘an mürsel Ahmed Çelebi b. İsmail ve Ahmed Çelebi b. Ali ile meclis-i şer‘a gelip alâ-vuku‘ihî inhâ ve takrîr etmeğin mâ-vaka‘a bi’t-taleb ketb olundu. Fî 20 min-Cumâdelûlâ sene 1143. Şuhûdü’l-hâl: el-Hâc Mustafa Efendi b. Mehmed el-imâm, Ahmed Ağa b. Mustafa, Mehmed Ağa b. Hasan, Molla Mehmed b. Abdullah, Ebubekir Çelebi b. Cafer