Bab Mahkemesi 54 Numaralı Sicil (H. 1102 / M. 1691) cilt: 20, sayfa: 89 Hüküm no: 57 Orijinal metin no: [9a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Öldürülen Mehmed b. Yakup’un muayenesi ve defnine izin verilmesi Mahmiye-i İstanbul’da Kocamustafapaşa Câmi‘-i şerîfinde sâkin Mehmed Usta b. Hüseyin nâm kimesne meclis-i şer‘-i şerîf-i enverde takrîr-i kelâm ve ta‘bîr ani’l-merâm edip, târih-i kitâbdan üç gün mukaddem vakt-i gurûbda Kocamustafapaşa müezzini olan Mustafa b. Mehmed nâm kimesne zikr olunan Mustafa Paşa çarşısında vâki‘ kalaycı dükkânı önünde şâkirdim Mehmed b. Yakub nâm kimesneyi bi gayri vech bıçak ile başının sağ tarafından vurup mecrûh etmekle, ol cerhden fevt olmuşdur. Taraf-ı şer‘den üzerine varılıp keşf ve tahrîr edip defnine izin verilmesi matlûbumdur deyu fermân-ı şerîf ibrâz etmeğin, imtisâlen savb-ı şer‘-i mutahhardan Mevlânâ Hasan Efendi b. el-Hâc Ramazan irsâl olunup, ol dahi mezbûr Mehmed Usta’nın mahall-i mezbûrda vâki‘ dükkânına varıp zeyl-i kitâbda muharrerü’l-esâmi müslimîn ile mecrûh-ı mezbûr Mehmed’i keşf ve nazar eylediklerinde, fi’l-vâki‘ mezbûr Mehmed’in vech-i meşrûh üzre başının sağ tarafında bıçak cerâhati olup, mecrûhan fevt olduğunu mu‘âyene ve müşâhede eylediklerinde vâki‘ hâli mevlânâ-yı mezbûr mahallinde tahrîr ve ma‘an ba‘s olunan Yahya b. Ahmed ve Mehmed b. İbrahim ile meclis-i şer‘-i şerîfe gelip vukū‘u üzre inhâ ve takrîr etmeğin, mezbûr Mehmed’in defnine izin verilip mâ hüve’l-vâki‘ bi’t-taleb ketb olundu. Fi’l-yevmi’l-hâmis ve’l-ışrîn min Cemâziyelevvel sene 1102. Şuhûdü’l-hâl: Mustafa Efendi b. Mehmed el-imâm, Şahin Bey b. Abdullah, İsmail b. Abdullah, Mustafa b. Abdullah, Ahmed Ağa b. ( ), Mehmed Usta b. ( ), Ali b. Abdullah, Yahya Çelebi b. Ahmed, Mehmed Çelebi b. İbrahim.