Bab Mahkemesi 54 Numaralı Sicil (H. 1102 / M. 1691) cilt: 20, sayfa: 90 Hüküm no: 58 Orijinal metin no: [9a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çelebi b. Ömer’in varislerinin alacaklı oldukları Mahmud Ağa b. Ali ile sulh olmaları Mahmiye-i İstanbul’da Müfti Ali Çelebi mahallesinde sâkin iken bundan akdem vefât eden Diyârbekirli Mehmed Çelebi b. Ömer’in verâseti, zevce-i metrûkesi Zahide bt. Ömer ile sulbî kebîr oğulları Mustafa Çelebi ve Sâlih’e münhasıra oldukdan sonra mezbûr Mustafa Çelebi kendi tarafından asâleten ve vâlidesi mezbûr Zahide Hâtun’la kardeşi mezbûr Sâlih taraflarından husûs-ı âti’l-beyâna vekîl olduğu mezbûreyi şer‘an ârifân Halil b. Mehmed ve Mustafa b. Abdullah şehâdetleriyle sâbit olmağla dahi vekâleten meclis-i şer‘-i şerîf-i enverde, işbu bâ‘isü’l-kitâb Mahmud Ağa b. Ali mahzarında ikrâr-ı tâm ve takrîr-i kelâm edip, babam müteveffâ-yı merkūmun mezbûr Mahmud Ağa zimmetinde cihet-i deyn-i şer‘îden otuz guruş hakkı olup ve medyûnu el-Hâc Fazlı zimmetinde hakkı olan doksan guruşa ve üzerindeki yüz on guruşa dahi merkūm Mahmud Ağa kefâlet-i sahîha ile kefîl olmağla, kable’l-ahz babam fevt olmağla irsen bize isâbet etmeğin, bundan akdem ben zikr olunan meblağ ki, cem‘an iki yüz otuz guruşu asâlet ve kefâletine binâ’en mezbûr Mahmud Ağa’dan taleb ve da‘vâ eylediğimde beynimizde ba‘de’n-nizâ‘ muslihûn tavassut edip merkūm Mahmud Ağa benimle otuz beş guruş üzerine sulh oldukda, biz dahi sulh-ı mezbûru kabûl ve bedel-i sulh olan meblağ-ı mezbûr otuz guruşu yedinden ahz u kabz ettiğimizden sonra asâleten ve kefâleten husûs-ı mezbûre müte‘allika âmme-i da‘vâdan merkūm Mahmud Ağa’nın zimmetini ibrâ-i âmla ibrâ ve iskāt eyledik dediklerinde, gıbbe’t-tasdîki’l-vicâhî mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn min Cemâziyelevvel sene 1102.